गेल्यावर्षाप्रमाणेच ‘रेडीरेकनर’चे दर, आर्थिक चट्टीविना मिळणार नवे घर!

वाढीव दर नसल्याने मिळाला दिलासा : यंदाच्या आर्थिक वर्षात जुनेच दर

कुंदन पाटील/जळगाव : कुठलीही वाढ न करता राज्य शासनाने गेल्या वर्षाप्रमाणे रेडी रेकनर दर (मिळकतीचे वास्तव बाजार मुल्य) कायम ठेवल्याने जळगावकरांना दिलासा मिळाला आहे. जळगावसह राज्यात दि.१ एप्रिलपासून घर किंवा इतर संपत्ती खरेदी करणे महागते की काय, अशी शंका जळगावकरांच्या मनात होती. मात्र राज्य शासनाचे उपसचीव सत्यनारायण बजाज यांनी यासंदर्भात शुक्रवारी निर्देश दिले. त्यानुसार २०२२-२३ चे वार्षिक बाजार मुल्य दर कायम ठेऊन ते २०२३-२४ या वर्षासाठी लागू करण्याचे सूचित केले आहे. 

कर आणि मुद्रांक शुल्काचे पैसे वाचवण्यासाठी काहीजण रेडी रेकनर दराच्या जवळ ठेवून खऱ्या मूल्यापेक्षा कमी किंमती दाखवतात. या प्रक्रियेद्वारे, लोक फक्त किमान नोंदणी शुल्क आणि मुद्रांक शुल्क भरतात आणि उर्वरित व्यवहार थेट पैशाच्या स्वरूपात करतात. यामुळे राज्य सरकारच्या महसुलाचे नुकसान होते आणि बाजारातील काळ्या पैशाचे प्रमाणही वाढते. त्यामुळेच रेडी रेकनरच्या दरवाढीविषयी सर्वसामान्यांमध्येही उत्सुकता असते.

रेडी रेकनर दर म्हणजे?
नोंदणी आणि मुद्रांक विभाग हे बांधकाम आणि जमिनींच्या खरेदी-विक्री व्यवहाराच्या नोंदणीसाठी मुद्रांक शुल्क आकारते. त्यासाठी संबंधित जमीन व इमारतीचे वेगवेगळ्या निकषानुसार आणि विभागानुसार वार्षिक बाजारमूल्य ठरविले जाते. त्यालाच रेडी रेकनर असे म्हणतात.दरवर्षी राज्य सरकार विविध क्षेत्रांवर आधारित नवीन रेडी रेकनर दर लागू करतात. रेडी रेकनर दर हा वेगवेगळ्या शहरा किंवा भागात वेगवेगळा देखील असतो. रेडी रेकनर दर हा किमान दर आहे. ज्याच्या आधारावर सरकार कोणत्याही मालमत्तेशी संबंधित व्यवहारासाठी नोंदणी शुल्क आणि मुद्रांक शुल्क आकारते.
जळगाव शहरातील काही भागातील रेडी रेकनर दर असे.

• विभाग                                        खुली जमीन                       निवासी इमारत              वरच्या मजला         तळमजला
• दाणाबाजार                                   ३९२००                               ५९५१०                         ६८४३०                  १३४२००
• नेताजी सुभाष मार्ग                         ३१३००                               ५३१००                         ६१०६०                  १२३७००
• फुले मार्केट (पूर्व भाग)                   २५३६०                               ४६३३०                         ५४०००                  १०५१००
• सराफ बाजार                                 ३९३००                               ५९६००                         ६८५४०                  १३४३००
• चित्रे मार्ग                                        २७५६०                            ५०१५०                          ५७६७०                  ९८४००
• बेंडाळे चौक                                    २४४८०                            ४४७२०                         ५१४२०                   ९७७००
• गोलाणी मार्केट ते पेट्रोलपंप            २७३००                            ४७५५०                          ५४६८०                  १०५१००
• स्टेशन रोड                                    ३६५४०                             ५७७२०                          ६५८६०                 १२३७००
• बळीराम पेठ                                 २५०३०                              ४५८००                           ५२६७०                 १००६००
• कांचननगर                                    ४५७०                               २५०००                          २८७५०                  ३१२५०
• रथ गल्ली                                     १५११०                                ३६१२०                         ४१५३०                    ८२४००
• जुना नशिराबाद रोड                      ९०००                                ३१५००                          ३६४००                   ५७९००
• सिंधी कॉलनी रोड                         १९८००                              ४०६००                           ४६६९०                  ९४७००
• नेरी नाका ते जीपीओ रस्ता            १५४००                              ३६२५०                          ४२५००                  ८३२००
• पंचमुखी कॉलनी परिसर                 १२०००                             ३३८३०                         ३९४००                   ७१११०
• अजिंठा रस्ता                                 ८२७०                               २९२८०                         ३४९००                   ५७०००
• रिंग रोड                                       २३६००                              ४४०००                         ५०६००                   ९४७००
• स्टेडियम ते रिंगरोड                      २५०००                              ४५८००                         ५२६७०                   १००६००
• ख्वॉजामिया रस्ता                         १७९००                             ४०१००                           ४६११०                   ९४७००
• प्रिंपाळा रस्ता                                 १३१००                            ३४१००                          ३९४००                  ७११००
• कानळदा रस्ता                               १४००                             २३२००                          २६६८०                   २९०००
• आसोदा रस्ता                                ४०००                              २५२००                          २८९८०                   ३१५००