चाकूचा धाक दाखवून दाम्पत्याला मारहाण

जळगाव : चाकूचा धाक दाखवून पती-पत्नीला मारहाण करणाऱ्या अक्षय बाब्या धोबी याला रामानंद नगर पोलिसांनी मंगळवारी अटक केली. किरकोळ कारणावरुन वाद होऊन अक्षय याने विवाहितेला जमिनीवर ढकलून देत अश्लील वर्तन केले. हा प्रकार सोमवारी रात्री ९ वाजता घडला. विवाहितेच्या फिर्यादीवरुन विनयभंग व आर्म ॲक्टचा गुन्हा दाखल करण्यात आला आहे.

जिल्ह्यात १० एप्रिल रोजी लोकअदालत

जळगाव : तडजोडपात्र खटले मिटविण्यासाठी १० एप्रिल रोजी जिल्ह्यातील सर्व न्यायालयांमध्ये लोक अदालतीचे आयोजन करण्यात आले आहे. यात मोटार वाहन, वाहतुकीचे चलन, भूसंपादन, धनादेश अनादर, वैवाहिक खटले, मोटार अपघात, दिवाणी व फौजदारी प्रकरणे, न्यायालयात प्रलंबित असलेले खटले लोकअदालतीत ठेवले जाणार आहेत. लाभ घेण्याचे आवाहन प्रमुख जिल्हा व सत्र न्यायाधीश एस.डी.जगमलानी व विधी सेवा प्राधिकरणाचे सचिव के.एच.ठोंबरे यांनी केले आहे.

कॅडबरी घ्यायला आलेल्याने बॅग लांबविली

जळगाव : दुकानात कॅडबरी घ्यायला आलेल्या ग्राहकाने दुकान मालकाचीच बॅग लांबविल्याचा प्रकार उघडकीस आला आहे. ११ मार्च रोजी कोर्ट चौकासमोर हा प्रकार घडला. याप्रकरणी सोमवारी शहर पोलिसात गुन्हा दाखल करण्यात आला आहे. दिनेशकुमार अर्जुनकुमार ललवाणी (३२,रा.दौलत नगर) यांची ही बॅग होती. त्यात १५ हजार रुपये, मोबाईल व काही कागदपत्रे होती.