पत्नीच्या चारित्र्यावर संशय घेत केला चाकूहल्ला

लोकमत न्यूज नेटवर्क

जळगाव : पत्नीच्या चारित्र्यावर संशय घेऊन तिच्यावर भाजी कापण्याच्या चाकूने हल्ला करीत गंभीर जखमी केल्याची घटना शुक्रवारी सकाळी ८.४५ वाजेच्या सुमारास गेंदालाल मिल येथे घडली. पती हारून मुस्तफा खान (रा. गेंदालाल मिल) याच्याविरुद्ध पत्नीच्या फिर्यादीवरून शहर पोलीस ठाण्यात गुन्हा दाखल करण्यात आला आहे.

जखमी आफ्रिनबी हारून खान या गेंदालाल मिल येथे पती, सासू व तीन मुलांसह वास्तव्यास आहेत. पती हारून हा मालवाहतूक चारचाकी वाहनावर चालक म्हणून काम करताे. दरम्यान, सासू ईदनिमित्त नातेवाइकांना भेटण्यास गेली होती तर मुलेदेखील बाहेर गेली होती. त्यामुळे पती-पत्नी दोघे घरी होते. शुक्रवारी सकाळी ८.३० वाजता पती हारून याने पत्नीकडे दाढी करण्यासाठी पैसे मागितले व नंतर दाढी करण्यासाठी घराबाहेर गेले. काही वेळानंतर ते दाढी न करता घरी परतले. व पत्नीच्या चारित्र्यावर संशय घेऊन तिला शिवीगाळ करण्यास सुरुवात केली.

स्वयंपाकघरातून चाकू आणून केला वार

हारून हा रागाच्या भरात स्वयंपाकघरात गेला. तेथून भाजी कापण्याचा चाकू आणून त्याने पत्नीच्या मनगटावर, छाती तसेच पोटाच्या मध्यभागी वार केला. नंतर मारहाण केली. चाकूच्या हल्ल्यामुळे मनगटातून रक्त निघत असल्याचे पाहून आफ्रिन यांनी आरडाओरड केली असता, गल्लीतील रहिवाशांनी खान यांच्या घराकडे धाव घेत भांडण सोडविले. जखमी आफ्रिन यांनी पोलिसात तक्रार दिल्यानंतर त्यांना उपचारासाठी जिल्हा रुग्णालयात दाखल करण्‍यात आले. या प्रकरणी पती हारून याच्याविरुद्ध गुन्हा दाखल करण्यात आला आहे.