‘मनोबल’ची महाराष्ट्रभरातील अपंग अनाथ विद्यार्थ्यांना साथ

लोकमत न्यूज नेटवर्क

जळगाव : कोरोनाच्या पार्श्वभूमीवर असलेल्या लॉकडाऊनची सर्वांनाच झळ सहन करावी लागत असताना दिव्यांग व अनाथ विद्यार्थ्यांसाठी हा काळ अधिकच आव्हानात्मक ठरत आहे. अशा वेळी या विद्यार्थ्यांना घरभाडे, किराणा साहित्य व इतर आवश्यक मदत मिळाल्यास ती दीपस्तंभच ठरते. याचा प्रत्यक्ष अनुभव राज्यभरातील विद्यार्थी जळगावातील मदतीमुळे घेत असून, यातून त्यांचे एक प्रकारे मनोबलच वाढले आहे. कोरोनाच्या या संकटाच्या काळात दिव्यांग व अनाथ विद्यार्थ्यांसाठी दीपस्तंभ फाउंडेशन संस्था पुढे सरसावली असून, या संस्थेने ‘आम्ही तुमच्यासोबत आहोत’ या उपक्रमाअंतर्गत २१० अनाथ व २४० अपंग विद्यार्थ्यांना आधार दिला आहे.

गेल्या वर्षी कोरोनाचा संसर्ग वाढला व सर्वच क्षेत्रावर त्याचा मोठा परिणाम झाला. याच कोरोना विषाणूमुळे संपूर्ण जग अजूनही हतबल आहे. भारतातही कोरोना विषाणूने हाहाकार माजवला आहे. महाराष्ट्रात कोरोनाची साखळी तोडण्यासाठी ब्रेक द चेन लागू करण्यात आले असून या निर्बंधांचा काळ सर्वांसाठी अडचणीचा आहे. यात दिव्यांग व अनाथ विद्यार्थ्यांसाठी तो अधिक जास्त आव्हानात्मक ठरत आहे. अशा परिस्थितीत दिव्यांग व अनाथ विद्यार्थ्यांसाठी दीपस्तंभ फाउंडेशन पुढे आले आहे.

४५० विद्यार्थ्यांना आधार

दीपस्तंभ फाउंडेशनच्या मनोबल प्रकल्पाअंतर्गत दिव्यांग, अनाथ विद्यार्थ्यांच्या निवासी निःशुल्क उच्चशिक्षण, स्पर्धा परीक्षा प्रशिक्षण, शिष्यवृत्ती, कौशल्य प्रशिक्षण देण्यात येते. त्यात आता कोरोनाचे संकट ओढावले असताना महाराष्ट्रभरातील आर्थिकदृष्ट्या असक्षम अपंग अनाथ, वंचित घटकातील विद्यार्थ्यांना या लॉकडाऊनच्या काळात आणि नंतरही शिक्षण, आरोग्य व इतर कुठलीही अत्यावश्यक मदत दीपस्तंभ मनोबल मार्फत करण्यात येत आहे. ‘आम्ही तुमच्यासोबत आहोत’ या उपक्रमाअंतर्गत २१० अनाथ व २४० अपंग विद्यार्थ्यांना सहकार्य करण्यात आले आहे. यामध्ये विद्यार्थ्यांच्या खात्यावर थेट घरभाड्याची रक्कम जमा करण्यात आली असून, काही जणांना किराणा साहित्यासाठी आर्थिक मदत तर काहींना थेट साहित्य देण्यात आले आहे.

स्वत: काम करीत उदरनिर्वाह करणारे अडचणीत

कोल्हापूर येथे असलेले ९४ गरजू अनाथ विद्यार्थी काम करून स्वतःचा उदरनिर्वाह करतात. लॉकडाऊनमुळे हे विद्यार्थी अडचणीत आले. याविषयी कोल्हापूरमधील मनीषा शिंदे व पुणे येथील सनाथ संस्थेच्या गायत्री पाठक यांनी या विद्यार्थ्यांबाबत दीपस्तंभ फाउंडेशनला कळविले. त्यावेळी त्यांना दीपस्तंभ फाउंडेशनतर्फे तीन दिवसांपूर्वीच किराणा साहित्य व इतर मदत करण्यात आली. दीपस्तंभ परिवारातील सदस्य राजेश झोलदेव (दिल्ली), एरंडे, संदीप काटे (सातारा), डॉ. राजेश डाबी यांनी यासाठी योगदान दिले.

मदतीसाठी हात मोकळे

उपक्रमासंदर्भात अधिक माहिती संस्थेच्या वेबसाइटवर दिली आहे. लॉकडाऊनमध्ये अपंग, अनाथ विद्यार्थ्यांना कुठलेही अत्यावश्यक सहकार्य लागल्यास तसेच ज्या व्यक्तींना या उपक्रमात सहभागी होऊन अनाथ , अपंग विद्यार्थ्यांना मदत करावयाची असल्यास त्यांनी संस्थेशी संपर्क करावा, असे आवाहन करण्यात आले आहे.

फोटो - लॉकडाऊनमुळे अडचणीत आलेल्या कोल्हापूर येथील अनाथ विद्यार्थ्यांना जळगावातील दीपस्तंभ मनोबल केंद्रातर्फे किराणा साहित्य देण्यात आले. यावेळी उपस्थित मनीषा शिंदे.