बीएचआर घोटाळ्यातील मास्टर माईंड अखेर जाळ्यात !

जळगाव : भाईचंद हिराचंद रायसोनी मल्टीस्टेट सहकारी पतसंस्था अर्थात बीएचआर या संस्थेतील कोट्यवधी रुपयांच्या घोटाळ्यातील मास्टर माईंड सुनील देवकीनंदन झंवर (रा.जय नगर, जळगाव) हा तब्बल ९ महिन्यानंतर पोलिसांच्या जाळ्यात अडकला. पुणे आर्थिक गुन्हे शाखेच्या पथकाने मंगळवारी सकाळी १० वाजता नाशिकमधून त्याच्या मुसक्या आवळल्या. पंचवटी पोलीस ठाण्यात अटकेची नोंद करुन त्याला पुण्यात आणण्यात आल्याची माहिती उपायुक्त भाग्यश्री नवटके यांनी ‘लोकमत’ ला दिली.

पुण्याच्या डेक्कन जिमखाना पोलीस ठाण्यात २५ नोव्हेंबर रोजी सेवानिवृत्त शिक्षिका तथा ठेवीदार रंजना खंडेराव घोरपडे (६५) यांनी दिलेल्या फिर्यादीवरुन फसवणूक व अपहाराचा गुन्हा दाखल झाला आहे. फिर्यादीत फसवणुकीचा आकडा १७ लाख ८ हजार ७४२ इतका होता तर आतापर्यंत तपासात ही रक्कम ६१ कोटी ९० लाख ८८ हजार १६३ रुपयांपर्यंत पोहोचली आहे. हा आकडा आणखी वाढण्याची शक्यता आहे. या गुन्ह्यातील मुख्य सूत्रधार व अवसायक जितेंद्र कंडारे यालाही सात महिन्यानंतर २९ जून रोजी इंदूर येथून अटक करण्यात आली आहे. कंडारे सध्या कारागृहात आहे. झंवर व कंडारे या दोघांना न्यायालयाने फरार घोषीत करण्याची प्रक्रिया सुरु केली होती. जिल्हा व उच्च न्यायालयाने दोघांचा अटकपूर्व जामीन वेळोवेळी फेटाळून लावला होता. झंवर हा वेशांतर करुन जळगाव, मुंबई, राजस्थान व इंदूर येथे वावरत होता. ९ महिने पुणे पोलीस त्याच्या मागावर होते. सोमवारी रात्रीपासून पुणे पोलिसांनी सापळा लावला होता. दरम्यान, या गुन्ह्यात आता योगेश किशोर साखला व माहेश्वरी (रा.जळगाव) हे दोन जण पोलिसांना हवे आहेत. झंवर याला बुधवारी पुणे न्यायालयात हजर केले जाणार असल्याची माहिती तपासाधिकारी पोलीस निरीक्षक सुचेता खोकले यांनी दिली.

अशी केली झंवरची खात्री

झंवर नाशिक येथे नातेवाईकाच्या घरी येणार असल्याची माहिती मिळाल्यानंतर पोलीस उपायुक्त भाग्यश्री नवटके यांनी एक पथक नाशिकला रवाना केले. सोमवारपासून पथकाने त्याच्या राहण्याचा ठावठिकाणी काढून घराच्या बाहेर सापळा रचला. मंगळवारी सकाळी १० वाजता तो गॅलरीत आला असता पथकाने त्याचा लांबूनच मोबाईलमध्ये फोटो घेतला. या फोटोतील व्यक्ती सुनील झंवरच आहे का? म्हणून नवटके व त्याला ओळखणाऱ्या पोलिसांना पाठविण्यात आला. खात्री पटताच पथकाने त्याला ताब्यात घेतले. लाल रंगाचे शर्ट, चष्मा व कपाळाला लाल टिळा त्याने लावला होता.