महापालिकेच्या ‘त्या’ कर्मचाऱ्यांचा महापौरांनी केला सत्कार

लोकमत न्यूज नेटवर्क

जळगाव : शहरातील गोलाणी मार्केटमधील तळमजल्यात मोठ्या प्रमाणात सांडपाणी जमा होत होते. याबाबत ‘लोकमत’ ने वृत्त प्रकाशीत केल्यानंतर लागलीच दुसऱ्या दिवशी सांडपाण्याचा निचरा करण्यासाठी चेंबरमध्ये जीव धोक्यात घालून सफाई करणाऱ्या त्या सात सफाई कर्मचाऱ्यांचा सत्कार महापौर जयश्री महाजन व उपमहापौर कुलभुषण पाटील यांच्या हस्ते करण्यात आला.

महापौरांच्या दालनात मनपा कर्मचाऱ्यांचा सत्कार करण्यात आला. यावेळी आरोग्य निरीक्षक रमेश कांबळे, सफाई कामगार बबलू गायकवाड, रणजित सनकत, परभत नाडे, रोहित सारसर, विजय नाडे, आनंद सपकाळे, गफ्फार सय्यद, सतीश पवार, उमेश बेडपाल या कर्मचाऱ्यांची उपस्थिती होती. यावेळी यापुढेही सतत अशाच पद्धतीचे काम अपेक्षित असल्याचे सांगत संबंधित कर्मचार्‍यांमध्ये ऊर्जा भरण्याचे काम महापौर जयश्री महाजन व उपमहापौर कुलभूषण पाटील यांनी केले. नगरसेवक किशोर बाविस्कर, चेतन सनकत यांच्यासह आरोग्य विभागाचे सहाय्यक उपायुक्त पवन पाटील याप्रसंगी उपस्थित होते.