आई, वडील गावाला, घरात मुलाची आत्महत्या

जळगाव : आई, वडील अकोला येथे लग्नाला गेलेले असताना इकडे मुलाने राहत्या घरात गळफास घेऊन आत्महत्या केल्याची घटना सोमवारी रात्री १०

वाजता घडली. हर्षल नितीन गायकवाड (वय १९, रा.जगवाणी नगर) असे आत्महत्या केलेल्या तरुणाचे नाव असून त्याचे कारण स्पष्ट झालेले नाही. मंगळवारी शवविच्छेदन झाल्यानंतर हर्षलवर अंत्यसंस्कार करण्यात आले.

केबल ऑपरेटर व ब्रोकर असलेले नितीन दगडू गायकवाड यांना तीन मुले होती. स्वप्नील (२१) हा मोठा असून हर्ष व हर्षल हे दोघे जुळे मुले होती. त्यातील हर्षल हा धनाजी नाना चौधरी महाविद्यालयात पदवीच्या प्रथम वर्षाला शिक्षण घेत होता. सोमवारी अकोला येथे लग्न असल्याने गायकवाड हे पत्नीसह गेले होते. घरी तिघे भाऊच होते. रात्री उशीर झाला तरी हर्षल दिसत नसल्याने त्याने मोबाईलवर संपर्क केला, परंतु होत नव्हता. मित्र तसेच ओळखीच्या ठिकाणी प्रत्यक्ष जाऊन चौकशी केली असता हर्षलची कुठेच माहिती मिळाली नाही. शोधून दमलेलेले दोघे भाऊ घरी आले व सहज वरच्या मजल्यावर जाऊन पाहिले असता त्याने गळफास घेतल्याचे दिसून आले. हे दृश्य पाहून भावाचा थरकाप उडाला. त्याने आई-वडिलांना घटनेची माहिती देऊन हर्षल याला भावाचे मित्र व इतर लोकांच्या मदतीने जिल्हा रुग्णालयात हलविले असता डॉक्टरांनी मृत घोषित केले. एमआयडीसी पोलीस ठाण्याचे लुकमान तडवी व सहकाऱ्यांनी पंचनामा केला. दरम्यान, वडील नितीन गायकवाड, आई विद्या मंगळवारी सकाळी आठ वाजता शहरात दाखल झाले. याप्रकरणी एमआयडीसी पोलीस ठाण्यात अकस्मात मृत्यूची नोंद करण्यात आली आहे.