मनपा स्थायीची आज सभा

जळगाव - मनपा स्थायी समितीच्या सभेचे आयोजन बुधवारी सकाळी ११ वाजता सभापती राजेंद्र घुगे-पाटील यांच्या अध्यक्षतेखाली मनपाच्या दुसऱ्या मजल्यावरील सभागृहात करण्यात आले आहे. कोरोनामुळे मार्च महिन्यापासून स्थायी समितीची सभा सभागृहात झालेली नव्हती. आता कोरोनाचा प्रादुर्भाव कमी झाल्याने ९ महिन्यानंतर मनपाच्या सभागृहात स्थायीची सभा होणार आहे. सभेत एकूण ९ विषय मंजुरीसाठी ठेवण्यात आले आहेत.

बळीराम पेठ भागात कारवाई

जळगाव - शहरातील बळीराम पेठ, सुभाष चौक, दाणा बाजार भागात मंगळवारी मनपा अतिक्रमण निर्मूलन विभागाकडून जोरदार कारवाई करण्यात आली. यामध्ये काही हॉकर्सकडून माल जप्त करण्यात आला. यासह उपायुक्त संतोष वाहुळे यांनी भजेगल्ली भागात जाऊन पाहणी केली. याठिकाणी तीन विक्रेत्यांनी आपली दुकाने थाटली होती. त्यांच्यावरही मनपाकडून कारवाई करण्यात आली.

पारा ९ अंशावर घसरला

जळगाव - जिल्ह्यात आता थंडीचा कहर अधिक वाढला आहे. मंगळवारी शहराचा किमान पारा ९ अंशापर्यंत खाली घसरला होता. या हंगामात दुसऱ्यांदाच पारा ९ अंशापर्यंत खाली घसरला आहे. थंडीचा कडाका वाढल्यामुळे जनजीवनावर देखील त्याचा परिणाम होताना दिसून येत आहे. यासह कमाल तापमान देखील २७ अंशापर्यंत खाली आल्यामुळे दिवसासह गारवा जाणवत आहे. अजून चार दिवस थंडीचा कडाका कायम राहणार असल्याचा अंदाज हवामान विभागाने व्यक्त केला आहे.

सुरत रेल्वेगेटवर पुन्हा वाहतूक कोंडी

जळगाव - शहरातील सुरत रेल्वेगेट जवळ वाहतूक कोंडीची समस्या आता वाढतच जात आहे. मंगळवारी सकाळी १०.३० वाजेच्या सुमारास याठिकाणी अवजड वाहनांनी रस्ता अडविल्याने सुमारे अर्धातास वाहतूककोंडी झाली होती. यामुळे याठिकाणी काही वाहनधारकांमध्ये वाद देखील झाले. याठिकाणी वाहतूक शाखेचा कोणताही कर्मचारी उपस्थित राहत नसल्याने मोठ्या प्रमाणात अडचणींचा सामना करावा लागत आहे.