नवे डीन डॉ. फुलपाटील लवकरच रुजू होणार?

लोकमत न्यूज नेटवर्क

जळगाव : नागपूर येथील शरीररचना शास्त्र विभागाचे प्राध्यापक डॉ. मिलिंद फुलपाटील यांची जळगाव शासकीय वैद्यकीय महाविद्यालय व रुग्णालयात शरीरचना शास्त्र विभागाचे प्राध्यापक म्हणून बदली करण्यात आली आहे. मात्र, हे पदच जळगावात रिक्त नाही. शिवाय त्यांच्याकडे अधिष्ठाता पदाचा अतिरिक्त कार्यभार सोपविण्यात आला आहे. त्यांना नागपुरातून कार्यमुक्त केल्याची प्राथमिक माहिती आहे.

अधिष्ठाता डॉ. जयप्रकाश रामानंद यांच्या जागेवर डॉ. फुलपाटील यांची बदली करण्याचे आदेश गुरुवारी सायंकाळी अचानक प्राप्त झाले. त्यांच्यासह विविध ११ प्राध्यापकांच्या बदल्या करण्यात आलेल्या आहेत. मात्र, जळगावात ज्यामुळे पदस्थापनेवर डॉ. फुलपाटील यांची बदली झाली आहे, ते पदच रिक्त नसून आदेशात कुठलीच स्पष्टता नसल्याचे बोलले जात आहे. डॉ. रामानंद यांच्याकडे मूळ पदभार हा धुळे श्री भाऊसाहेब हिरे वैद्यकीय महाविद्यालयातील औषधशास्त्र विभागाचे प्राध्यापकाचा असून डॉ. फुलपाटील हे रुजू झाल्यानंतर तातडीने आपण त्यांना पदभार सोपविणार असल्याची माहिती डॉ. रामानंद यांनी दिली. बदली अचानक झालेली नसून अनेक प्राध्यापकांच्या बदल्या झालेल्या आहेत, असेही त्यांनी सांगितले.