न.पा. विद्युत कर्मचाऱ्याला महिलांनी केली धक्काबुक्की

अमळनेर : येथील नगर परिषदेच्या विद्युत विभागाचे कर्मचारी आबिद शेख यांना रात्रीच्या सुमारास आपले कर्तव्य बजावताना फरशी रोडवर महिलांकडून धक्काबुक्की व शिवीगाळ झाल्याने न. पा. कर्मचारी संघटनांनी या घटनेचा निषेध केला आहे.

न. पा. कर्मचारी आबिद शेख हे विद्युत विभागात कार्यरत आहेत. २६ मे रोजी रात्री ९ वाजता ते गांधलीपुराजवळील नवीन फरशी पुलावर कृषिभूषण मार्गावर पथदिवे चालू बंद स्थितीत पाहण्यासाठी गेले असताना काही महिला त्याठिकाणी आल्या आणि तू काय करीत आहेस, अशी विचारणा करून त्याला शिवीगाळ करत मोबाइल हिसकण्याचा या महिलांनी प्रयत्न केला. तसेच धक्काबुक्की केली. यावेळी शेख यांनी या प्रभागाचे नगरसेवक नरेंद्र संदानशिव यांना बोलावले. तरीही महिलांनी शिवीगाळ सुरूच ठेवली.

कर्मचारी संघटना आक्रमक

सदर प्रकाराचा आम्ही सर्व न.पा. अधिकारी आणि कर्मचारी जाहीर निषेध करीत असल्याचे कर्मचारी इंटक संघटनेचे अध्यक्ष प्रसाद शर्मा, जनरल सेक्रेटरी सोमचंद सदानशिव यासह इतर संघटनांच्या पदाधिकाऱ्यांनी म्हटले आहे. दरम्यान, सदर प्रकार अवैध व्यवसायात काही तरी बाधा येत असल्याने झाला असल्याची चर्चा असून, परिसरातील नागरिकदेखील या घटनेचा निषेध नोंदवित आहेत.