विदगाव येथे आजाराला कंटाळून वृद्धाची आत्महत्या

लोकमत न्यूज नेटवर्क

जळगाव : आजारपणाला कंटाळून श्रीराम जीवराम कोळी (वय ७०) या वृद्धाने राहत्या घरात गळफास घेऊन आत्महत्या केल्याची घटना शनिवारी सकाळी विदगाव, ता.जळगाव येथे उघडकीस आली. या प्रकरणी तालुका पोलीस ठाणे मृत्यूची नोंद करण्यात आली आहे.

सूत्रांकडून मिळालेल्या माहितीनुसार, श्रीराम जीवराम कोळी हे पत्नी व दोन मुलांसह विदगाव येथे वास्तव्याला होते. गेल्या काही दिवसांपासून ते आजाराने त्रस्त होते. शुक्रवारी रात्री कुटुंबासोबत जेवण करून घराच्या मागच्या खोलीत एकटेच झोपले होते. मध्यरात्री सर्वजण झोपलेले असताना, राहत्या घरात गळफास घेऊन त्यांनी आत्महत्या केली. सकाळी उठल्यावर पत्नी लताबाई यांना हा प्रकार लक्षात आला. त्यांना तातडीने शासकीय वैद्यकीय महाविद्यालय व रुग्णालयात दाखल केले असता, वैद्यकीय अधिकाऱ्यांनी त्यांना मृत घोषित केले. शवविच्छेदन करून मृतदेह नातेवाइकांच्या ताब्यात देण्यात आला. त्यांच्यापश्चात पत्नी लताबाई, समाधान व देवीदास ही दोन मुले, सुना व विवाहित मुलगी असा परिवार आहे. या प्रकरणी तालुका पोलिसात आकस्मिक मृत्यूची नोंद करण्यात आली आहे. तपास हवालदार संजय चौधरी करीत आहेत.