बुट विक्री करणार्‍या वृध्दाला चौघांनी लुटले

जळगाव : शहरात बुट विक्रीचा व्यवसाय करणार्या बाबुलाल डिगंबर निंबोरे (वय ७१)या परप्रांतीय वृध्दाला रिक्षात बसून चौघांनी दमदाटी करुन त्याच्याकडील ४ हजार ५०० रुपये रोख व मोबाईल असा एकूण ५ हजार ६०० रुपयांचा ऐवज लुटून नेल्याची घटना मंगळवारी उघडकीस आली आहे. याप्रकरणी शनीपेठ पोलिस ठाण्यात चौघांविरोधात गुन्हा दाखल करण्यात आला आहे.

सूत्रांनी दिलेल्या माहितीनुसार, मध्यप्रदेशातील बोरी येथील मुळ रहिवाशी असलेले बाबुलाल डिगंबर निंबोरे हे बुट विक्री व्यवसायानिमित्ताने शहरात आले आहेत. २० रोजी रात्री ११ वाजेच्या सुमारास राजकमल चौक येथे रिक्षाची प्रतीक्षा करीत होते. एका रिक्षात बसल्यानंतर आधीच त्यात चौघे जण बसलेले होते. त्यातील एकाने खाली उतरुन निंबोरे यांना इतरांच्या मधोमध बसविले. राजकमल चौक सोडताच चौघांनी निंबोरे यांच्या खिशातील ४ हजार ५०० रुपयांची रोकड व १ हजार १०० रुपये किंमतीचा मोबाईल असा एकूण ५ हजार ६०० रुपयांचा ऐवज बळीजबरीने काढून घेत निंबोरे यांना बी.जे. मार्केटसमोर झिपरु अण्णा समाधी जवळ रिक्षातून उतरवून दिले आणि चौघे पसार झाले. याप्रकरणी २३ फेब्रुवारी रोजी निंबोरे यांनी शनीपेठ पोलीस ठाण्यात तक्रार दिली आहे. त्यावरुन चौघा अज्ञातांविरोधात गुन्हा दाखल करण्यात आला आहे. तपास पोलीस निरीक्षक विठ्ठल ससे करीत आहेत.