दुचाकीच्या अपघातात एक जागीच ठार तर एक गंभीर जखमी

पळासखेडे बुद्रुक येथील घटना.

पळासखडे बुद्रुक, ता.जामनेर : येथील सुरेशचंद्र धारीवाल पॉलीटेक्निक महाविद्यालयाजवळ दुचाकीच्या समोरासमोर झालेल्या अपघातात येथून जवळच असलेल्या केकतनिंभोरा गावातील रहिवाशी अशोक जगन शिंगोटे (वय ४५) यांचा जागीच मृत्यू झाला. तर अभय संजय जाधव (वय २५ रा.गोद्री ता.जामनेर) हा गंभीर जखमी झाला. ही दुर्घटना २८ रोजी दुपारी ३ वाजेच्या सुमारास घडली.
शिंगोटे यांच्या पत्नीची तब्येत बरी नसल्याने त्यांच्यावर जामनेर येथील खाजगी रुग्णालयात उपचार सुरू होते. शिंगोटे हे आपल्या पत्नीला भेटून दुचाकीने (एम.एच.१५ - ए.पी.१४८७) जामनेरहून केकतनिंभोरा येथे जात असताना नेरी कडून जामनेरकडे येणाऱ्या दुचाकीशी (एम.एच.१९ - डी.ई .९५८२) समोरासमोर धडक झाली. त्यात अशोक शिंगोटे यांचा जागीच मृत्यू झाला असून त्यांचा शव विच्छेदनासाठी जामनेर येथील उपजिल्हा रुग्णालयात आणण्यात आले. जखमी अभय जाधव याला पुढील उपचारासाठी जळगाव येथे हलविण्यात आले आहे. मयत शिंगोटे हे मोलमजुरी करून आपल्या कुटुंबाचा उदरनिर्वाह करीत असे. त्यांच्या पश्चात पत्नी,२ मुले,१ मुलगी असा परिवार आहे. याबाबत जामनेर पोलीस स्टेशनमध्ये अकस्मात मृत्यूची नोंद करण्यात आली आहे.