मनवेल येथील ऑनलाइन ग्रामसभा कोरमअभावी तहकूब

मनवेल, ता. यावल : मनवेल ग्रामपंचायतीने मंगळवारी आयोजित केलेल्या ऑनलाइन ग्रामसभेला ग्रामस्थ सहभागी न झाल्याने ग्रामसभा कोरमअभावी तहकूब करण्यात आली.

ऑनलाइन ग्रामसभा ही संकल्पना ग्रामीण भागातील लोकांना नवीन असल्याने किंवा याबाबत सविस्तर माहिती उपलब्ध नसल्याने २७ लोक प्रत्यक्ष सहभागी झाले. त्यामुळे कोरमअभावी ग्रामसभा तहकूब करण्यात येत असल्याचे ग्रामसेवक भरत पाटील यांनी जाहीर केले.

गेल्या दोन वर्षांपासून कोरोनामुळे सर्वच क्षेत्रात सामाजिक अंतराचा वापर करून बैठका, सेमिनार, अभ्यास वर्ग घेतले जात आहेत. याच पद्धतीने " पोखरा " योजनाचा लाभ शेतकऱ्यांना मिळावा म्हणून ऑनलाइन ग्रामसभा घेण्याची परवानगी शासनाने दिल्याने मनवेल येथे ऑनलाइन ग्रामसभा आयोजित करण्यात आली होती; मात्र ती कोरमअभावी तहकूब करण्यात आली.

" पोखरा" योजनेचा लाभ शेतकऱ्यांना मिळावा म्हणून कृषी संजवनी समिती गठित करण्यासाठी ऑनलाइन ग्रामसभा आयोजित करण्यात आली, यासाठी ३० मिनिटांचा कालावधी निश्चित केला होता.

३० मिनिटांच्या कालावधीत कृषी संजीवनी समिती गठित करण्याबाबत सर्व विषयांची माहिती देण्यात आली. लोकसंख्येच्या १० टक्के किंवा कमीत कमी १०० लोकांची उपस्थिती आवश्यक असते; परंतु ऑनलाइन ग्रामसभा ही कार्यप्रणाली ग्रामीण भागातील लोकांसाठी नवीन असल्याने किंवा या ऑनलाइन सभेसाठी आवश्यक असणारे स्मार्टफोन तसेच त्यासाठी वापरण्यात येणारे ॲप अशा संगणकीय प्रणालीची माहिती ग्रामस्थांना पुरेशी माहिती नसल्याने या सभेला ऑनलाइन उपस्थित राहता न आल्याने अनेक ग्रामसभेला कोरम पूर्ण झाला नाही. यामुळे ग्रामसभा तहकूब करण्यात आली.