प्रेयसीशी लग्न करता यावे म्हणून पत्नीचा छळ

जळगाव : लग्न झालेले असतानाही पतीने परस्रीशी संबंध ठेवले. संबंधित महिलेशी दुसरे लग्न करता यावे म्हणून पतीने पत्नीचा शारीरिक तसेच मानसिक छळ केल्याची घटना समोर आली आहे. या घटनेप्रकरणी विवाहितेच्या फिर्यादीवरून गुरुवारी पती अनिल आनंदा बागूल रा. ब्राम्हणे ता. एरंडोल व ती महिला या दोघांविरोधात तालुका पोलीस ठाण्यात गुन्हा दाखल झाला आहे.

विवाहितेने पोलिसात दिलेल्या फिर्यादीनुसार, शिंदखेडा तालुक्यातील बेटावद येथील मनीषा हिचा २२ मे २०१५ रोजी एरंडोल तालुक्यातील अनिल आनंदा बागूल याच्याशी विवाह झाला. लग्नानंतर त्यांना दोन मुलेही झाली. अनिल हा कंपनीत नोकरीला आहे. २०१६ मध्ये एरंडोल राहत असताना पती अनिल याची एका महिलेशी ओळख झाली. यानंतर दोघांमध्ये भेटीगाठी वाढत अनिल याने तिच्यासोबत अनैतिक संबंध प्रस्थापित केले. यादरम्यान एक ते दोन वेळा तिला घरीही घेऊन आला. या अनैतिक संबंधांची माहिती मिळाल्यावर मनीषा हिने पती अनिल यास विचारले असता, अनिलने पत्नी मनीषा हिस शिवीगाळ करत मारहाण केली. तसेच यानंतर वारंवार घटस्फोट देण्याची धमकी देऊन मारहाण करायला लागला. यादरम्यान काळात पती अनिल याने मनीषा हिच्या माहेरून १ लाख रुपये घेतले, लग्नात मिळालेले ६ तोळे सोनेही अनिलकडे आहेत. तसेच अनिल हा मनीषाच्या माहेरच्यांकडे वारंवार पैशाची मागणी करून त्यावरून मनीषा हीस मारहाण करून तिचा मानसिक छळ करत होता. एके दिवशी अनिलने पत्नी मनीषा हीस मला दुसरे लग्न करायचे असून फारकत देऊन टाक, असे सांगत मारहाण केली. यात तिच्या उजव्या डोळ्याला गंभीर दुखापत झाली. अशाप्रकारे पतीचा छळ तसेच अपमानास्पद व क्रूर वागणूक असह्य झाल्याने मनीषा ही ५ मे २०२० रोजी माहेरी निघून आली व गुरुवारी तालुका पोलीस ठाण्यात तक्रार दिली.