जून अखेर भुसावळला ‘रेल नीर’ प्रकल्प सुरू होणार

सहायक महाव्यवस्थापकांची माहिती : प्रकल्पात स्थानिक युवकानांच रोजगार देणार

सचिन देव

जळगाव : भुसावळला आयआरसीटीसी मार्फत ‘रेल नीर’ प्रकल्प उभारण्यात येत असून, हे काम वेगाने सुरू आहे. या वर्षी जूनअखेर हा प्रकल्प सुरू होणार असून, या

प्रकल्पात स्थानिक युवकांनाच रोजगार देण्यात येणार असल्याची माहिती आयआरटीसीचे सहायक महाव्यवस्थापक आनंद झा यांनी ‘लोकमत’शी बोलतांना दिली.

इंडियन रेल्वे कॅटरिंग अ‍ॅण्ड टुरिझम कॉर्पोरेशन (आयआरसीटीसी) मार्फत भुसावळला गेल्या दीड वर्षांपासून रेल्वे नीर प्रकल्पाचे काम सुरू आहे. सध्या हे काम ९० टक्के पूर्ण झाले आहे. भुसा‌वळातील एमआयडीसीत हा प्रकल्प उभारला जात असून, हैदराबाद येथील हायमॅक्स कंपनीतर्फे या प्रकल्पासाठी लागणाऱ्या मशिनरींची उभारणी करण्यात येत आहे. ८ हजार ५५० चौरस मीटरमध्ये या प्रकल्पाचे काम असून, यासाठी ८ कोटींचा खर्च प्रस्तावित आहे. या प्रकल्पात तीन पाळीत कर्मचारी काम करणार असून, २४ तासात ७२ हजार पाण्याच्या सीलबंद बाटल्या तयार होणार आहेत. ही पाण्याची बॉटल भुसावळ विभागातील सर्व स्टेशनवर १५ रुपये किमतीला विक्री करण्यात येणार आहे. यामुळे स्टेशनवरील इतर कंपन्यांच्या पाण्याच्या बॉटल विक्रीला बंदी घालण्यात येणार आहे.

इन्फो :

महाराष्ट्रातील तिसरा प्रकल्प

भुसावळ एमआयडीसीत उभारण्यात येणारा ‘रेल नीर’चा प्रकल्प हा महाराष्ट्रातील तिसरा प्रकल्प ठरणार आहे. सध्या राज्यात नागपूर व अंबरनाथ येथे प्रकल्प सुरू असून, लवकरच भुसावळ येथेही सुरू होणार आहे. दरम्यान, या प्रकल्पात मनुष्यबळाच्या भरतीसाठी आयआरसीटीसीतर्फे लवकरच नोकर भरतीची जाहिरात काढण्यात येणार असून, योग्य अर्हता प्राप्त असलेल्या स्थानिक उमेदवारांना प्राधान्य देण्यात येणार आहे. साधारणत : १०० ते १२५ जागांची या ठिकाणी भरती प्रक्रिया होणार असल्याचे आयआरसीटीसीतर्फे सांगण्यात आले.

इन्फो :

प्रवाशांना मिळणार स्वस्त व शुद्ध पाणी

सुमारे आठ कोटी रुपये खर्चून उभ्या राहणाऱ्या भुसावळातील ‘रेल नीर’ प्रकल्पामध्ये प्रवाशांना अवघ्या १५ रुपयात स्वस्त व शुद्ध पाण्याची बॉटल मिळणार आहे. या नीर प्रकल्पात विविध प्रकारच्या १२ टप्प्यात जल शुद्धीकरणाची प्रक्रिया होणार असून, यामध्ये तुरटी प्रक्रिया, क्लोरिनायझेशन, कार्बन फिल्टर, त्यानंतर १० मायक्रॉन ते ०. ५ मायक्रॉन पर्यंतच्या फिल्टर प्रक्रियेतून हे पाणी शुद्ध होणार आहे. एस.एन. फुड्स या कंपनीला हे काम सोपविण्यात आले असल्याचे आयआरटीसीतर्फे सांगण्यात आले.

इन्फो :

आयआरसीटीसीतर्फे भुसावळला ‘रेल नीर’ प्रकल्पाचे काम युद्ध पातळीवर सुरू असून, येत्या सहा महिन्यात हा प्रकल्प सुरू होईल. या प्रकल्पात २४ तासात ७२ हजार पाण्याच्या बॉटल तयार होणार असून, या प्रकल्पात कामासाठी स्थानिक तरुणांनाच नोकरीची संधी देणार आहोत.

- आनंद झा, सहायक महाव्यवस्थापक तथा मुख्य जनसंपर्क अधिकारी, आयआरसीटीसी, दिल्ली.