रानडुकराचा पितापुत्रावर हल्ला, पुत्र जागीच ठार

यावल : तालुक्याच्या उत्तर सीमेवरील सातपुडा पर्वताच्या जामन्या परीमंडळात आदिवासी पितापुत्रावर रानडुकराने हल्ला केला. यात १६ वर्षीय पुत्र जागीच ठार झाला. तर ४५ वर्षीय पिता गंभीर जखमी झाला असून येथील ग्रामीण रुग्नालयात पित्यास उपचारार्थ दाखल केले आहे.
जामुनझीरा आदिवासी वस्तीवरील सभासिंग रेंजला बारेला (वय ४५ ) व मुलगा राजु सभासिंग बारेला (वय १६) हे मध्य प्रदेशातील गांंटया या आदिवासी गावास भावाकडे गेले होते. रविवारी गांटया येथून सातपुडयाच्या जंगलातून परततांना येथील जामन्या परीमंडळाच्या आंबापाणी जंगलातील १०३ वनखंडात अचानक रानडुकराने जोरदार हल्ला केला. त्यात राजु हा जागीच ठार झाला आहे. तर सभासींग बारेला ४५ वर्षे गंभीर जखमी होवून जागेवरच बेशुध्द झाले होते. दुपारी येथील वनविभागास वृत्त कळताच वनक्षेत्रपाल विशल कुटे व सहकाऱ्यांनी मृतक राजु बारेला व जखमी सभासींंग बारेला यानां येथील ग्रामीण रुग्नालयात आणल्यांनतर जखमीवर उपचार केलेत. याबाबत येथील पोलीस ठाण्यात अकस्मात मृत्युची नोंद करण्यात आली.