मुलांचा सांभाळ करण्यासह लग्नाचे आमिष दाखवून महिलेवर बलात्कार

गुन्हा दाखल : पतीशी घ्यायला लावला घटस्फोट

लोकमत न्यूज नेटवर्क

जळगाव: पतीशी घटस्फोट घ्यायला लावून दोन्ही मुलांचा सांभाळ करण्यासह लग्नाचे आमिष दाखवून ३२ वर्षीय महिलेवर जळगाव, पुणे व धुळ्यात बलात्कार झाल्याची घटना उघडकीस आली आहे. याप्रकरणी नीलेश दत्तात्रय सोनजे (रा.शिव कॉलनी) याच्याविरुध्द रामानंद नगर पोलिसात बुधवारी गुन्हा दाखल झाला आहे.

पोलिसात दाखल फिर्यादीनुसार, पीडित महिलेचे नंदूरबार येथील तरुणाशी २००९ मध्ये विवाह झाला होता. पतीपासून तिला दोन मुले असून काही कारणास्तव दोघांमध्ये मतभेद झाल्याने पीडिता जळगाव शहरात माहेरी वास्तव्य करीत आहे. या काळात १२ मे २०१९ रोजी नीलेश सोनजे याच्याशी पीडितेची ओळख झाली. त्याचे रुपांतर प्रेमात झाले. नीलेश याने मी तुझ्याशी लग्न करेल. तुझ्या दोन्ही मुलांचाही सांभाळ करेल. तुला कोणत्याच गोष्टीची कमी पडू देणार नाही. आनंदात ठेवेल असे सांगून पतीपासून घटस्फोट घ्यायला लावला. 

त्याच्या सांगण्यावरुन १४ सप्टेबर २०२२ रोजी पतीशी घटस्फोट घेतला. मधल्या काळात नीलेश याने लग्न करणारच आहोत म्हणून शरीरसुखाची मागणी केली. मागणी पूर्ण केली नाही तर आपल्यातील प्रेमसंबंधाची बाहेर वाच्यता करेल व तुझ्यासह मुलांचेही बरेवाईट करेल अशी धमकी दिली. त्यामुळे शिवकॉलनीत त्याच्या घरी, भजे गल्लीतील लॉज, पुणे व धुळ्यातील लॉजमध्ये नेऊन वेळावेळी जबरदस्तीने शरीरसंबंध ठेवल्याचे फिर्यादीत नमूद आहे. शारीरीक संबंध ठेऊन लग्नास नकार दिला व मुलांचा मारण्याची धमकी दिल्यामुळे त्याच्याविरुध्द गुन्हा दाखल झाला आहे. सहायक पोलीस निरीक्षक रोहीदास गभाले तपास करीत आहेत.