कन्नड घाटात रस्त्यालगत संरक्षक भिंतींची डागडुजी

चाळीसगाव : कन्नड घाटरस्त्यालगत अपघात टाळण्यासाठी संरक्षक भिंतीसह शहरातील धुळे रोडवरील महाविद्यालयासमोर असणारे खड्डेही नुकतेच बुजविण्यात आले. ही मोहीम चाळीसगाव विभागाचे अपर पोलीस अधीक्षक सचिन गोरे यांनी राबवली.

महाविद्यालयासमोर मोठे खड्डे पडल्याने वाहनधारकांसाठी समस्या निर्माण झाली होती. हे खड्डे बुजविल्याने पादचारी व वाहनचालकांनी समाधान व्यक्त केले आहे.

कन्नड घाटात रस्त्यालगत बहुतांशी संरक्षक भिंतींची पडझड झाली होती. या संरक्षक भिंतींमुळे वाहने दरीत कोसळण्यापासून बचावतात. याच भिंतींची गेल्या आठ ते दहा दिवसांपासून ठिकठिकाणी डागडुजी करण्यात आली. यासाठी अपर पोलीस अधीक्षक सचिन गोरे यांनी वैयक्तिक लक्ष घालून ही मोहीम राबवली.

धुळे रोडवरील रेल्वे पुलावर चाळीसगाव महाविद्यालयासमोर मोठे खड्डे पडले होते. गेल्या काही महिन्यांपासून ही समस्या वाहनचालकांसाठी चांगलीच डोकेदुखी ठरत होती. खड्डे मोठे असल्याने दरदिवशी अपघातही होत होते. येथेही गोरे यांनी लक्ष घालून हे खड्डे बुजविले. यामुळे हा रस्ता आता वाहनचालकांसाठी सोयीचा झाला आहे. पारोळा रोडवरही दिशादर्शक व आवश्यक सूचना देणारे फलकही नुकतेच लावण्यात आले आहे. नागरिक व वाहनधारकांच्या सोयीसाठी ही मोहीम हाती घेण्यात आल्याची माहिती सचिन गोरे यांनी दिली. वाहतूक नियमांचे पालन करून नागरिकांनी वाहने चालवावीत, असे आवाहनही त्यांनी केले आहे.

060721\06jal_6_06072021_12.jpg

कन्नड घाटात रस्त्यालगत संरक्षक भिती