आरटीपीसीआर चाचणीचे अहवाल लवकर द्या

महापौरांची मागणी: पाच-पाच दिवस प्रलंबित राहताहेत अहवाल

लोकमत न्यूज नेटवर्क

जळगाव - शहरात कोरोना रुग्णांची संख्या दिवसेंदिवस वाढत असून संसर्ग अधिक पसरत आहे. कोरोना संशयितांची मनपाकडून आरटीपीसीआर चाचणी केली जात असून त्याचे तपासणी स्वॅब शासकीय वैद्यकीय महाविद्यालय व रुग्णालयात पाठविण्यात येत आहे. वैद्यकीय महाविद्यालयातील यंत्रणा कमी पडत असून, रुग्णांना तब्बल पाच-पाच दिवस अहवालांसाठी प्रतीक्षा करावी लागत आहे. यामुळे अनेक रुग्ण स्वॅब देवून बाहेर देखील फिरतात त्यामुळे अहवाल लवकरात लवकर मिळण्यासाठी संबंधित यंत्रणेला सूचना देऊन कार्यवाही करावी, अशी मागणी महापौर भारती सोनवणे यांनी पालकमंत्री गुलाबराव पाटील यांच्याकडे केली आहे.

याबाबत महापौरांनी पालकमंत्र्यांना निवेदन देखी दिले आहे. शहरात गेल्या १५ दिवसांपासून कोरोनाचा संसर्ग वाढू लागला असून रुग्णांची संख्या दररोज वाढत आहे. मनपाकडून रुग्णांची कोरोना चाचणी करण्याची व्यवस्था शासकीय अभियांत्रिकी महाविद्यालयात करण्यात आलेली आहे. याठिकाणी दररोज सरासरी २०० संशयितांचे आरटीपीसीआर स्वॅब जिल्हा रुग्णालय व वैद्यकीय महाविद्यालयात पाठविण्यात येतात. मात्र, दररोज सरासरी केवळ ६० लोकांचे अहवाल मनपाला प्राप्त होत आहेत. अनेक रुग्णांचे अहवाल ५-५ दिवस उशिरा येत असल्याने संशयित रुग्ण परिवारात आणि बाहेर इतरांमध्ये मिसळत असल्याने कोरोनाचा संसर्ग अधिक वाढतो. कोरोना आरटीपीसीआर चाचणीचे अहवाल लवकरात लवकर मिळावे यासाठी संबंधित विभागाला योग्य त्या सूचना देत यंत्रणा अधिक सक्षम करावी, अशी मागणी महापौरांनी केली आहे.