सावदा शहरात बायोडिझेलचे विक्री पंप बिनदिक्कतपणे सुरू

रावेर : शहरातील बऱ्हाणपूर रोडवर रॉकेलमिश्रित बायोडिझेलची अवैध विक्री व साठवणूक करणाऱ्या दोन जणांविरुद्ध गुन्हा दाखल करून साडेतीन लाख रुपयांचा ऐवज जप्त करण्याची धडक कारवाई रावेर पोलिसांनी केल्यानंतर पुन्हा गुरुवारी सावदा ते रावेर रस्त्यावर रीतसर पावती घेऊन बायोडिझेलची वाहतूक करणाऱ्या छोट्या मालवाहू वाहनाला पकडत सावदा शहरात बायोडिझेलची विक्री करणारा पंप सर्रास सुरू असल्याची बाब उघड केल्याने एकच खळबळ उडाली आहे. जिल्हा प्रशासनाने अद्यापपावेतो एकाही बायोडिझेल पंपाला अधिकृत परवानगी दिली नसताना, संबंधित महसूल प्रशासनाने बायोडिझेल पंपाचा मालक बाहेरगावी असल्याच्या सबबीखाली कागदपत्रे पडताळणीसाठी दिलेली उशीरमाफीची मुदत मात्र शंकास्पद असल्याची टीका जनसामान्यांत होत आहे.

रावेर पोलिसांनी शहरातील बऱ्हाणपूर रोडवर असलेल्या गोपी रोडलाइन्ससमोर आरोपी शेख शरीफ शेख मुस्लीम (वय ३८) व शेख फिरोज शेख मुस्लीम (वय २७) दोन्ही रा. फकीरवाडा, रावेर यांना नामांकित कंपनीच्या बायोडिझेलचा रिक्षावर बनवलेल्या रॉकेलमिश्रित बायोडिझेलच्या मोबाइल पंपाद्वारे अवैध विक्री व साठवणूक करताना ३ लाख ६० हजार रुपयांचा ऐवज जप्त करण्याची धडक कारवाई केली होती.

दरम्यान, सावदा येथून बायोडिझेलची वाहतूक करणारे छोटे मालवाहू वाहन रावेरकडे येत असल्याची भणक रावेर पोलिसांना लागताच रावेर पोलीस स्टेशनचे निरीक्षक रामदास वाकोडे यांच्या मार्गदर्शनाखाली सहायक पोलीस निरीक्षक शीतलकुमार नाईक यांच्या पोलीस पथकाने त्या वाहनाला ताब्यात घेऊन तपासणी केली असता संबंधिताने सावदा येथील बायोडिझेल विक्री करणाऱ्या पंपावरून रीतसर बिल घेऊन आल्याचे स्पष्ट केले होते.

त्या अनुषंगाने सहायक पोलीस निरीक्षक शीतलकुमार नाईक यांनी तहसीलदार उषाराणी देवगुणे यांच्याशी संपर्क साधून बायोडिझेल विक्री करणाऱ्या पंपाची चौकशी करण्याबाबत माहिती दिली असता पुरवठा निरीक्षक अतुल नागरगोजे व सावदा मंडळाधिकारी संदीप जयस्वाल यांना घटनास्थळी पाठवले. सदर बायोडिझेल पंपाचा मालक बाहेरगावी असल्याने कागदपत्र पडताळणीसाठी मुदत मिळावी, अशी विनंती संबंधित पंपचालकाने केल्याने महसूल प्रशासनाने त्याला कागदपत्रे सादर करण्यासाठी उशीरमाफी करून संबंधित वाहनचालकाला सोडून दिल्याने सखेद आश्चर्य व्यक्त होत आहे.

दुसरीकडे जिल्ह्यात आजपावेतो गुणात्मक दर्जाचे बायोडिझेल उत्पादन, विक्री, पुरवठा व साठवणूक करण्यासाठी एकही परवानगी दिली नसल्याने, कोणी बायोडिझेल विक्री, उत्पादन, साठवणूक वा पुरवठा करताना आढळून आल्यास त्याचेकडील अत्यावश्यक परवानगींची पडताळणी करून जीवनावश्यक वस्तू कायदा १९५५ च्या तरतुदींनुसार कायदेशीर कारवाई करण्याच्या सक्त सूचना जिल्हा पुरवठा अधिकारी सुनील सूर्यवंशी यांनी दिल्या असताना सावदा शहरात बायोडिझेलचा बिनदिक्कतपणे पंप सुरू असल्याने एकच खळबळ उडाली आहे.

पुरवठा निरीक्षक व महसूल भाग मंडळाधिकाऱ्यांनी सदर बायोडिझेल पंपचालकाला विचारणा केली असता त्याने मालक बाहेरगावी असून, त्यांच्याकडे अत्यावश्यक त्या परवानगी असल्याने कागदपत्रे सादर करण्यासाठी मुदतवाढ मागितली आहे. संबंधित पंपमालकाकडील दस्तावेज पाहून बायोडिझेल पंपाच्या वैधतेची पडताळणी करणे शक्य होईल.

-उषाराणी देवगुणे, तहसीलदार, रावेर