महामार्गावर दिवसभर विक्री सुरू

जळगाव : महामार्गावर अग्रवाल चौक ते शिव कॉलनी या भागात दिवसभर खेळणी, कपडे तसेच फळविक्री सुरू असते. महापालिकेचे अधिकारी मुख्य बाजारपेठेत अकरा वाजेनंतर थेट कारवाई करतात. मात्र, दिवसभर महामार्गावर सुरू असलेल्या या दुकानांकडे कुणीही लक्ष देत नाही.

छाटलेल्या फांद्या उचला

जळगाव : आयएमआर ते कन्या शाळा या रस्त्यावर महावितरणने काही दिवसआधी झाडांच्या फांद्या छाटल्या होत्या. विद्युत तारांना अडणाऱ्या फांद्या महावितरणच्या कर्मचाऱ्यांनी तोडल्या होत्या. या फांद्या न उचलता तशाच पडलेल्या आहेत. त्या उचलून नेण्याची मागणी परिसरात राहणाऱ्या नागरिकांकडून होत आहे.

डांबरीकरण करा

जळगाव : जिल्हा उद्योग केंद्राच्या बाजूने महामार्ग ते प्रोफेसर कॉलनीला जोडणाऱ्या रस्त्यावर डांबरीकरण करण्याची मागणी परिसरातील नागरिकांकडून केली जात आहे. गेल्या दोन ते तीन महिन्यांपासून या रस्त्यावर महामार्ग प्राधिकरणाने खडी टाकून ठेवली आहे. त्यामुळे या रस्त्यावर लवकरात लवकर डांबरीकरण करण्याची मागणी होत आहे.