शाहु नगरात महिलेला मारहाण सोन्याची पोत लांबविली

जळगाव : शाहू नगरात नसरिनबी शेख वसीम (वय २८) या महिलेला घरात घुसून दोघांनी मारहाण करीत तिच्या गळ्यातील २० हजार रुपये किंमतीची मंगलपोत तोडून नेल्याचा प्रकार उघडकीस आला आहे. याप्रकरणी शुक्रवारी परवीनबी शेख वसीम आणि शेख यासीन (रा.शाहू नगर) यांच्याविरुध्द शहर पोलीस ठाण्यात जबरी चोरीचा गुन्हा दाखल करण्यात आला आहे. १ डिसेंबर रोजी रात्री ९ वाजता ही घटना घडली. नसरिनबी वसीम या १ डिसेंबर रोजी बाहेरगावी गेल्या होत्या. रात्री ९ वाजता त्या घरी आल्यावर घरात नासधूस केल्याचे दिसून आले. त्यांनी शाहुनगर भागातील परवीनबी शेख वसीम आणि शेख यासीन यांना याबाबत विचारणा केली असता त्यांनी डोक्यात लोखंडी झारेने मारून गंभीर दुखापत केली आणि गळ्यातील २० हजार ४०० रूपये किंमतीची मंगलपोत तोडून घेतली. तपास सहायक पोलीस निरीक्षक गणेश बुवा हे करीत आहे.

धानवड येथे मका जळून खाक

जळगाव : तालुक्यातील धानवड येथील रवींद्र पाटील यांचा ५० क्विंटल मका जळून खाक खाक झाला आहे. ३ डिसेंबर रोजी रात्री १२ वाजता हा प्रकार उघडकीस आला. कोणीतरी हा मका जाळल्याचा संशय आहे. नीलेश सुरेश पाटील यांच्या मालकीचे हे शेत असून रवींद्र धोंडू पाटील यांनी हा मका तयार करुन शेतात ठेवलेला होता. याप्रकरणी एमआयडीसी पोलीस ठाण्यात गुन्हा दाखल करण्यात आला आहे.