भाऊ वरपक्षाला निमंत्रण देण्यासाठी गेला असताना बहिणीचा विजेच्या धक्क्याने मृत्यू

नशिराबाद : बहिणीच्या विवाहासाठी मुलाची चौकशी व त्यांना आमंत्रण देण्यासाठी भाऊ धुळे येथे गेलेला असताना गावात याच बहिणाचा विजेच्या धक्क्याने मृत्यू झाल्याची दुर्देवी घटना नशिराबाद येथे घडली.

मिळालेली माहिती अशी की, वरची आळीतील महाजन वाड्यात योगिता शांताराम महाजन (वय २१) वाणिज्य शाखेच्या शेवटच्या वर्षाला जळगाव येथे शिक्षण घेत होती. ती शनिवारी सकाळी घरातील साफसफाई करीत होती तर आई शेतामध्ये मजुरीकाम करण्यासाठी गेली होती. भाऊ नंदू हा योगिताच्या विवाहासाठी मुलाची चौकशी व त्यांना आमंत्रण देण्यासाठी धुळे येथे गेला होता.

त्यावेळी योगिता ही लोखंडी शोकेसची साफसफाई करीत होती. त्याचवेळी त्यात विजेचा प्रवाह उतरल्यामुळे तिला विजेचा धक्का बसला व तिचा जोरात आवाज आला. त्यावेळी शेजारीच असलेल्या काकूने घराकडे धाव घेतली व आरडाओरड केली. तोपर्यंत योगिता गतप्राण झाली होती. या घटनेमुळे परिसरातील सर्वांचेच डोळे पाणावले.