महिलेची छेड काढल्यावरून दोन गटांत धूमश्चक्री

भुसावळ : महिलेची छेड काढल्याच्या कारणावरून दोन गटांत तुफान हाणामारी केल्याची घटना शहरातील जाम मोहल्ल्यातील मच्छीवाडा भागात २९ रोजी घडली. यात दोन्हीकडील सहा जण जखमी झाले असून, १६ जणांविरुद्ध बाजारपेठ पोलीस ठाण्यात गुन्हा दाखल करण्यात आला आहे.

यामध्ये तेहरिन नासीर शेख (वय २५, रा. जाम मोहल्ला, भुसावळ) यांनी दिलेल्या फिर्यादीवरून त्यांची मावशी लल्ला ऊर्फ मौसीनाबी इब्राहीम मलिक (वय ३०) हिची रिजवान शेख ऊर्फ टिल्लू याने छेड काढली असता, फिर्यादीने याचा जाब विचारला. त्यास वाईट वाटल्याने रिजवान शेख ऊर्फ टिल्लू, शेख इमाम शेख गफुर, शेख तौहीफ शेख इमाम, शेख बिसमिल्ला शेख रहीम, गुड्डु (चुरण विकणारा), शेख इरफान शेख रहीम, शेख इमरान यांनी तेहरिन नासीर शेख यांना लाथाबुक्क्यांनी मारहाण केली. तसेच आरोपी शेख इरफान शेख रहीम याने फिर्यादीस लोखंडी रॉडने डोक्यास मारहाण केली. यावरून सात जणांविरुद्ध गुन्हा दाखल करण्यात आला आहे.

दुसऱ्या फिर्यादीत शेख इम्रान शेख रहीम (वय ३२, रा. जाम मोहल्ला, भुसावळ) यांनी दाखल केलेल्या फिर्यादीवरून त्यांच्या घरातील लोक हे आरोपींच्या घरातील स्त्रियांची छेड काढतात, असा गैरसमज झाला. यामुळे आरोपी तेहरीन शेख, तोहीफ शेख, उबेद शेख, आकीब शेख, जशीन शेख फरीद मच्छीवाला यांची दोन मुले व गंगा मच्छीवाला यांचा मुलगा यांनी फिर्यादी शेख इम्रान यांना आकीब शेख यांने लोखंडी रॉडने तर उबेद शेख याने चाकूने डाव्या हातावर मारुन जखमी केले. या सर्वानी फिर्यादी यांचा भाऊ रिजवान यास मारहाण करून जखमी केले. तसेच तेहरीन याने फिर्यादी यांचा भाऊ बिसमिल्ला यास जीवे मारण्याच्या उद्देशाने तलवार मारली असता ती त्याच्या डाव्या हाताच्या मनगटावर मारुन गंभीर दुखापत केली. तसेच इरफान शेख यासही मारहाण करुन फिर्यादी यांच्या घरात येऊन सलमान याने फिर्यादी यांचे वडील रहीम यांच्या डोक्यावर रॉडने मारुन जखमी केले. तसेच घरातील सामानाची तोडफोड करुन स्त्रियांनासुद्धा मारहाण केली. जखमींना गोदावरी रुग्णालयात उपचारासाठी दाखल करण्यात आले असून, यात पाच जण जखमी झाले असून, आठ जणांविरुद्ध गुन्हा दाखल करण्यात आला आहे. पुढील तपास सहायक पोलीस निरीक्षक मंगेश गोटला करीत आहे.