रेशन कार्डच्या सर्व समस्या तत्काळ सोडवा
By लोकमत न्यूज नेटवर्क | Published: July 4, 2021 04:13 AM2021-07-04T04:13:04+5:302021-07-04T04:13:04+5:30
मुक्ताईनगर : नागरिकांच्या रेशन कार्डबाबतीत सर्व समस्या तत्काळ सोडविण्यात याव्यात; अन्यथा शिवसेनेतर्फे आंदोलन करण्याचा निर्धार करण्यात आला आहे. ...
मुक्ताईनगर : नागरिकांच्या रेशन कार्डबाबतीत सर्व समस्या तत्काळ सोडविण्यात याव्यात; अन्यथा शिवसेनेतर्फे आंदोलन करण्याचा निर्धार करण्यात आला आहे.
गेल्या सात ते आठ महिन्यांपासून मुक्ताईनगर शहरासह तालुक्यातील नवीन रेशन कार्ड, रेशन कार्ड, आधार लिंकिंग व इतर जिल्ह्यांत आधार लिंक झालेली नावे याबाबत दुरुस्तीची कामे तातडीने होत नाहीत. पुरवठा विभाग ऑनलाइन होत नसल्याचे कारण व सदरील वेबसाइट बंद किंवा सर्व्हर जाम असल्याचे कारण देऊन, तर कधी तहसीलदारांचे थंब होत नसल्याची कारणे करून नागरिकांची रेशन कार्डसंबंधी कामे प्रलंबित ठेवत आहेत. अशा एक ना अनेक कारणांनी रेशन कार्ड बाबतीत प्रश्न कायमच प्रलंबित ठेवण्यात येत असतात. नागरिकांना अन्न सुरक्षा योजना, प्राधान्य कुटुंब, केशरी कार्ड धान्यापासून वंचित राहावे लागते, तसेच इतर योजनांपासून लांब ठेवण्याचा संतापजनक प्रकार येथे सुरू असल्याने याप्रकरणी तात्काळ योग्य त्या उपाययोजना राबविण्यात याव्यात, नागरिकांचे रेशन कार्ड बाबतीत सर्व समस्या तत्काळ सोडविण्यात याव्यात; अन्यथा शिवसेनेतर्फे आंदोलन करण्यात येईल, अशा इशाऱ्याचे निवेदन शिवसेनेतर्फे तहसीलदार श्वेता संचेती यांना देण्यात आले. हे निवेदन नायब तहसीलदार पानपाटील यांनी स्वीकारले.
निवेदन देतेवेळी शहरप्रमुख गणेश टोंगे, शहर संघटक वसंत भलभले, युवा सेना तालुकाप्रमुख पंकज राणे, शकूर जमदार, जाफर अली, हारुण शेख, नगरसेवक मुकेश वानखेडे, आरीफ आझाद, सलीमखान, लीलाधर पाटील, कैलास बावणे, पप्पू मराठे, शुभम शर्मा आदी उपस्थित होते.