रस्त्यात अडविले, मोबाईल हिसकाविला; आरडा-ओरड होताच लोकांनी पकडले !

तिघांना अटक, एक फरार ; रामानंदनगर पोलिसात गुन्हा

जळगाव : मोबाईल दुरूस्तीसाठी घेऊन जात असताना लखिचंद वामन बडगुजर (५६, रा. दादावाडी) यांना चार जणांनी रस्त्यात अडवून मारहाण करीत त्यांचा मोबाईल हिसकावून पळ काढला. दरम्यान, त्यांनी आरडा-ओरड केल्यामुळे आजू-बाजूच्या लोकांनी तीन जणांना पकडले. मात्र, एक पसार होण्यास यशस्वी झाला. ही घटना शुक्रवारी दुपारी १ वाजेच्या सुमारास पिंप्राळा आठवडे बाजार रस्त्यावर घडली असून तिघांना रामानंदनगर पोलिसांच्या ताब्यात देण्यात आले आहे.

लखिचंद बडगुजर हे दादावाडी येथे कुटूंबासह वास्तव्यास असून स्कूल बस चालवून कुटूंबियांना उदरनिर्वाह करतात. तीन दिवसांपासून बंद असल्यामुळे बडगुजर हे शुक्रवारी दुपारी १ वाजेच्या सुमारास मोबाईल घेऊन दुरूस्तीसाठी पिंप्राळ्यातील सोमाणी मार्केट येथे जाण्यासाठी निघाले. आदर्श हॉटेल मागील पिंप्राळा आठवडे बाजार रस्त्यावरून जात असताना त्यांना चार तरूणांनी अडवून त्यांच्या खिशातील मोबाईल बळबजरीने हिसकाविला. त्यांनी प्रतिकार केला पण, चौघांनी त्यांना मारहाण करून पळ काढण्याचा प्रयत्न केला. मात्र, बडगुजर यांनी आरडा-ओरड केल्यानंतर आजू-बाजूच्या लोकांनी लागलीच तीन जणांना पाठलाग करून पकडले तर एक जण पळून जाण्यात यशस्वी झाला. त्यानंतर लोकांनी तिघांना रामानंदनगर पोलिसांच्या ताब्यात दिले. त्यानंतर बडगुजर यांच्या फिर्यादीवरून गुन्हा दाखल करण्यात आला आहे.