विद्यार्थ्याच्या अपहरणाचा प्रयत्न फसला

शहरातील माळी गल्ली भागात राहणार दामू देवीदास चौधरी यांचा मुलगा आदित्य देवीदास चौधरी याच्या अपहरणाचा प्रयत्न आज येथे झाला. या प्रकाराने गावात एकच खळबळ उडाली होती.

जामनेर : शहरातील माळी गल्ली भागात राहणार दामू देवीदास चौधरी यांचा मुलगा आदित्य देवीदास चौधरी याच्या अपहरणाचा प्रयत्न आज येथे झाला. या प्रकाराने गावात एकच खळबळ उडाली होती. 
आदित्य हा शाळेत गेला असता अपहरणकर्त्यांनी त्याला पळविण्याचा प्रयत्न केला. मात्र विद्यार्थ्याने स्वत:च अपहरणकर्त्यांच्या हातास हिसका मारून स्वत:ची सुटका करून घेतल्याने हा प्रयत्न फसला. 
शहरातील नूतन प्राथमिक विद्यामंदिरमध्ये शिकणारा आदित्य चौधरी हा शाळेतून घराकडे येत असताना रस्त्यावर उभ्या असलेल्या पांढर्‍या रंगाच्या ओमनी गाडीतून उतरून एक महिला व पुरुषाने त्याच्याजवळ येऊन त्याला चॉकलेट खायला दिले. मात्र त्याने ते खाण्यास नकार दिला. यानंतर त्याला अपहरणकर्त्यांनी हात ओढून गाडीत बसविले. यावेळी त्याला अपहरणकर्त्यांकडून मारहाण करण्यात आली. मात्र विद्यार्थ्याने त्याच्या हातातून हात सुटताच गाडीतून बाहेर उडी घेऊन पळ काढला. त्यानंतर शाळेतील काही शिक्षक गाडीजवळ आल्याने अपहरणकर्त्यांनी तिथून पळ काढला ही घटना सदर विद्यार्थ्याने घरी येऊन आपल्या वडिलास सांगितली. त्यानंतर दत्तू चौधरी यांनी याबाबत जामनेर पोलिसात कळविले. एक ते दीड तासानंतर पोलीस उपनिरीक्षक मोहन बोरसे यांनी घरी जाऊन घडलेला प्रकार विचारला. विद्यार्थ्याने आपबिती सांगितली. नेहमी होणार्‍या अपहरणाच्या प्रयत्नाच्या प्रकारामुळे जामनेर शहरासह तालुक्यातील विद्यार्थी, पालकवर्गात भीतीचे वातावरण आहे.