तरुणाची गळफास घेवून आत्महत्या

जळगाव : आसोदा येथील २१ वर्षीय तरूणाने राहत्या घरात गळफास घेवून आत्महत्या केल्याची घटना गुरूवारी घडली. याप्रकरणी तालुका पोलीस ठाण्‍यात अकस्मात मृत्यूची नोंद करण्‍यात आली आहे. चेतन दिलीप चौधरी असे मयत तरूणाचे नाव आहे.

चेतन चौधरी हा आसोदा येथे कुटूंबियांसह वास्तव्यास होता. गुरूवारी त्याने राहत्या घरात गळफास घेतला. हा प्रकार कुटूंबियांना कळताच, त्यांनी लागलीच त्यास जिल्हा रूग्णालयात उपचारार्थ नेले. वैद्यकीय अधिका-यांनी तपासणीअंती त्यास मृत घोषित केले. याप्रकरणी तालुका पोलीस ठाण्यात अकस्मात मृत्यूची नोंद करण्‍यात आली आहे.

===================

स्वच्छतेची मागणी

लोकमत न्यूज नेटवर्क

जळगाव : शिवकॉलनी उड्डाणपुल परिसरातील रस्त्याच्याकडेला कचरा साचला आहे. नुकताच या भागामध्ये बाजारही भरत आहे. त्यामुळे रस्त्याच्याकडेला खराब भाजीपाला सुध्दा फेकला जातो. त्यामुळे या भागात साफसफाई करण्‍यात यावी, अशी मागणी परिसरातील नागरिकांनी केली आहे.

==================

फुले मार्केट भागात वाहतुकीची कोंडी

लोकमत न्यूज नेटवर्क

जळगाव : गेल्या काही दिवसांपासून सायंकाळी सात वाजेच्या सुमारास शहरातील प्रमुख रस्त्यांवर वाहतुकीची कोंडी होण्‍याचे प्रमाण वाढले आहे. शुक्रवारी सुध्दा फुले मार्केट परिसरात वाहतुकीची कोंडी झाली होती. सोबतच पिंप्राळा रस्त्यावरील भाजीबाजारामुळे या रस्त्यावरी दोन्ही बाजूची वाहतूक ठप्प होण्‍याचा प्रकार नित्याचेच झाले आहे.

====================

दुचाकीची समोरासमोर धडक

जळगाव : जळगाव-पाळधी रस्त्यावर शुक्रवारी दुपारी दुचाकींची समोरासमोर धडक झाली. खड्डा चुकविण्‍याच्या नादात हा अपघात झाला. सुदैवाने या अपघातात कुणालाही दुखापत झालेली नाही. दरम्यान, या रस्त्यावरील खड्डे बुजविण्‍यात यावे, अशी मागणी वाहनधारकांकडून करण्‍यात आली आहे.