‘माझ्यामुळे लोकांचा मूड ऑफ म्हणून मीच होतो दुनियेतून ऑफ’ असे स्टेटस ठेवून तरुणाची आत्महत्या

अयोध्यानगरातील घटना : चार महिन्यांपूर्वीच झाले होते लग्न

जळगाव : माझ्यामुळे लोकांचा मूड ऑफ होतो म्हणून मीच स्वत:च दुनियेतून ऑफ होत असल्याचे मोबाइलला स्टेटस ठेवून हर्षल प्रेमनाथ महाजन (वय २९) या तरुणाने राहत्या घरी गळफास घेऊन आत्महत्या केल्याची घटना बुधवारी सकाळी अयोध्यानगरात उघडकीस आली.

सूत्रांनी दिलेल्या माहितीनुसार, हर्षल जैन हा कंपनीत कामाला होता. अयोध्यानगरातील सद्गुरूनगरात तृप्ती कॉर्नरजवळ तो आई-वडील, पत्नी, भाऊ, वहिनी यांच्यासह वास्तव्याला होता. चार महिन्यांपूर्वीच त्याचे लग्न झाले होते. काही दिवसांपूर्वी पत्नी गायत्री हिच्याशी भांडण झाले, त्यामुळे पत्नी माहेरी निघून गेली. त्या दिवसापासून तो नैराश्येत होता. त्याची पत्नी गरोदर असल्याचे समजते.

रात्री घेतला गळफास

मंगळवारी रात्री आई-वडिलांसोबत जेवण झाल्यावर आई-वडील पुढच्या खोलीत झोपले, तर हर्षल मागच्या खोलीत जाऊन झोपला होता. पहाटे ४.३० वाजता वडील उठले असता हर्षलने गळफास घेतल्याचे दिसून आले. हे दृश्य पाहून आई-वडिलांना मोठा धक्का बसला. त्यांनी प्रचंड आक्रोश केला. या घटनेची माहिती मिळाल्यानंतर एमआयडीसी पोलीस ठाण्याचे हेमंत कळसकर व चंद्रकांत पाटील यांनी घटनास्थळी धाव घेतली. पंचनामा करून मृतदेह जिल्हा रुग्णालयात हलविला. दरम्यान, कळसकर यांनी हर्षलचा मोबाइल तपासला असता त्यात स्टेटस ठेवलेले आढळले. सुसाइड नोट वगैरे काही आढळली नाही, त्यामुळे त्याने नेमकी आत्महत्या कोणत्या कारणामुळे केली हे अजून स्पष्ट झालेले नाही. हर्षलच्या पश्चात आई छायाबाई, वडील प्रेमनाथ एकनाथ महाजन, मोठा भाऊ राहुल, वहिनी सुरेखा व पत्नी गायत्री असा परिवार आहे. याप्रकरणी एमआयडीसी पोलीस ठाण्यात अकस्मात मृत्यूची नोंद करण्यात आली आहे.

लोकांच्या मनावर अधिराज्य केले

हर्षल याने पहाटे २.२२ वाजता मोबाइलमध्ये स्टेटस ठेवले. त्यात त्याने म्हटले आहे की, माझ्यामुळे लोकांचा मूड ऑफ झाला; पण मी स्वतः दुनियेतून ऑफ होत आहे. मी माझ्या छोट्याशा जीवनाचा प्रवास खूप छान केला. लोकांच्या मनावर अधिराज्य केले. काहींच्या डोक्यात आणि मित्र परिवार छान लाभले. माझे आई-वडील दुनियेतील खूप छान देवमाणूस आहेत. पुढचा जन्म त्यांच्या पोटीच जन्माला येवो ही प्रार्थना देवाला करतो आणि कोणाला मी या गोष्टीला जबाबदार नाही समजत आणि कोणाला काही चुकीचे बोलले गेले असेल तर माफी मागतो, मला माफ करा, असे स्टेटस त्याने ठेवले अन् गळफास घेतला.