सुनील झंवर माझ्यासह सर्वांचेच निकटवर्तीय

जळगाव : बीएचआर पतसंस्था गैरव्यवहार प्रकरणात अटक करण्यात आलेले सुनील झंवर हे माझ्यासह सर्वांचेच निकटवर्तीय आहेत. पोलीस यंत्रणा चौकशी करीत आहे, त्यात सर्व काही निष्पन्न होईल, असा दावा माजी मंंत्री गिरीश महाजन यांनी शुक्रवारी जळगावात केला.

दरम्यान, पाऊस नसल्याने शेतकरी संकटात सापडला असून जिल्ह्यात सरसकट दुष्काळ जाहीर करून शेतकऱ्यांना मदत द्यावी, अशी मागणीदेखील त्यांनी केली.

गेल्या अनेक दिवसांपासून खान्देशात पाऊस नसल्याने उपाययोजना करण्याच्या मागणीसाठी भाजपच्यावतीने शुक्रवारी जिल्हाधिकाऱ्यांना निवेदन देण्यात आले, त्यावेळी पत्रकारांशी बोलताना झंवर यांच्याविषयी त्यांनी वरील वक्तव्य केले.

कोणी सांगावे, निकटवर्तीय नाही?

बीएचआर पतसंस्था गैरव्यवहार प्रकरणात मास्टरमाईंड सुनील झंवर याला अटक झाल्यानंतर त्याचे कोणा-कोणाशी संबंध आहेत, कोण निकटवर्तीय आहे, याविषयी चर्चा सुरू झाली आहे. सोबतच झंवर याच्याकडे काही मंडळींची कागदपत्रेही सापडली. या अटकेनंतर झंवर हे आपले निकटवर्तीय असण्याविषयी गिरीश महाजन यांना विचारले असता ते म्हणाले की, पोलीस यंत्रणा चौकशी करीत आहे. कायद्यानुसार जे होईल ते होणारच आहे. झंवर हे तर सर्वांचेच निकटवर्तीय असून, तसे नसल्यास कोणी सांगावे, असे आव्हानही त्यांनी दिले. यासंदर्भात त्यांनी अधिक बोलणे टाळले.

सरसकट मदत करा

पाऊस नसल्याने जिल्ह्यात दुबार, तिबार पेरण्या करूनही त्या वाया जात आहेत. सर्वच पिके नष्ट झाली असून नदी, नाले, धरणांत पाणीसाठा वाढलेला नाही. त्यामुळे राज्य सरकारने पंचनामे न करता सरसकट मदत द्यावी, जोपर्यंत ढग आहेत, तोपर्यंत कृत्रिम पावसासाठीही प्रयत्न करावा, अशी मागणीही गिरीश महाजन यांनी केली. याविषयी त्यांनी जिल्हाधिकारी अभिजित राऊत यांना निवेदनदेखील दिले.

यावेळी भाजपचे जिल्हाध्यक्ष आमदार सुरेश भोळे, आमदार संजय सावकारे, माजी आमदार स्मिता वाघ, जि. प. अध्यक्षा रंजना पाटील, उपाध्यक्ष लालचंद पाटील, भाजप जिल्हा महानगराध्यक्ष दीपक सूर्यवंशी आदी उपस्थित होते.

मंत्र्यांचे केवळ दौरे, जिल्हावासीयांची निराशाच

महाविकास आघाडीतील मंत्री निवडणुका डोळ्यासमोर ठेवून जिल्ह्याचे दौरे करीत आहेत. त्यांनी यावे, मात्र जिल्ह्यासाठी काहीतरी द्यावे, अशी मागणी त्यांनी केली. हे मंत्री येऊन निघून जातात, मात्र शेतकरी, सामान्य जनता यांचा विचार करीत नसल्याचा आरोप महाजन यांनी केला. गावा-गावात विजेचा प्रश्न गंभीर असून शेतकऱ्यांनाही पुरेशी वीज मिळत नाही. रोहित्र जळाले तर ते मिळत नाही व ऑईलचे कारण सांगितले जाते. इतकी बिकट अवस्था राज्यात कधी नव्हती. अशा परिस्थितीकडे हे सरकार दुर्लक्ष करीत असल्याचा आरोप महाजन यांनी केला.