सुनील झंवर न्यायालयाला शरण

वॉरंट करून घेतले रद्द : कंडारेचा अटकपूर्व जामिनासाठी अर्ज

लोकमत न्यूज नेटवर्क

जळगाव : बीएचआर घोटाळ्यातील मुख्य संशयित सुनील झंवर हा पुण्याच्या विशेष न्यायालयाला ५ मार्चला स्वत: शरण आला असून त्याने फरार घोषित होण्याचे वॉरंट रद्द करून घेतले आहे.

बीएचआर घोटाळ्याप्रकरणी पुण्याच्या विशेष न्यायालयाने मुख्य संशयित सुनील झंवर व जितेंद्र कंडारे यांना फरार घोषित करण्यासाठी १२ फेब्रुवारीला घोषणापत्र जारी केले होते. त्यानुसार तीस दिवसांच्या आत अर्थात १४ मार्चपर्यंत दोघा मुख्य संशयितांना न्यायालय, पोलिसांना शरण येण्याचे वॉरंट काढण्यात आले होते. दरम्यान, पुढील आठवड्यात वॉरंटची मुदत संपुष्टात येऊन दोघांना फरार घोषित करण्यात येणार होते. त्याचबरोबर त्यांच्या मालमत्ता जप्त करण्यासाठीची कार्यवाही सुरू झाली असती. मात्र, त्यापूर्वी सुनील झंवर हा पुण्याच्या विशेष न्यायालयाला शरण आला आहे. त्याने वॉरंटही रद्द करून घेतले. त्यामुळे त्यास १७ मार्चपर्यंत अटकेपासून दिलासा मिळाला आहे.

अटकपूर्व जामीन अर्ज

जितेंद्र कंडारे यालाही १४ मार्चपर्यंत शरण येण्याचे वॉरंट काढलेले आहे. त्यापूर्वी त्याने पुणे न्यायालयात अटकपूर्व जामीन अर्ज केला असून त्यावर १२ मार्च रोजी सुनावणी होणार आहे़ दरम्यान, सूरज झंवर यानेही सुध्दा मुंबई उच्च न्यायालयात जामिनासाठी अर्ज केला आहे. त्यावर १० मार्चला निकाल होईल. संशयित विवेक ठाकरेच्याही जामीन अर्जावर २४ मार्च रोजी निकाल आहे.