विवाहितेचा संशयास्पद मृत्यू

सासरच्यांचा आरोप

ठळक मुद्दे गीझरचा स्फोट झाल्याचा दावा, मात्र घटनास्थळावर आढळला रॉकेलचा डबा व पेटी

जळगाव : घरात आंघोळीसाठी गेलेल्या रिया विक्की सचदेव (२८) या विवाहितेचा जळून मृत्यू झाल्याची घटना शनिवारी सकाळी साडे अकरा वाजता सम्राट कॉलनीत घडली. रिया यांनी आत्महत्या केली की हिटरचा शॉक लागून जळाल्याने मृत्यू झाला हे स्पष्ट झालेले नाही. याप्रकरणी एमआयडीसी पोलीस स्टेशनला अकस्मात मृत्यूची नोंद करण्यात आली आहे.
याबाबत सूत्रांकडून मिळालेल्या माहितीनुसार, रिया यांचे पती विक्की सचदेव हे किराणा वस्तूंचे मार्केटींग करतात. शनिवारी सकाळी ते कामावर गेले होते तर सासु व इतर सदस्य खालच्या खोलीत होते. रिया या ११ वाजता वरच्या मजल्यावर आंघोळीसाठी गेल्या होत्या. अर्ध्या तासाने घरातून धूर येत असल्याचे पाहून शेजारील लोकांनी धाव घेतली असता रिया या जळत होत्या. लोकांनी अंगावर चादर टाकून त्यांना विझविले व तातडीने जिल्हा रुग्णालयात हलविले असता डॉक्टरांनी मृत घोषित केले. रिया यांना मृत घोषित करताच रुग्णालयात आलेल्या सासु, पती व इतर नातेवाईकांनी एकच हंबरडा फोडला.
मृत्यूबाबत तर्कवितर्क
रिया यांचा मृत्यू हिटरचा शॉक लागून झाल्याचे नातेवाईकांकडून सांगितले जात होते. घरात गादी व इतर कपडेही जळालेले होते. शिवाय घरात कोणीच नसल्याने खरोखर हिटरचा शॉक लागला कि त्यांनी जाळून घेतले हे समजू शकले नाही. गल्लीतील चर्चेनुसार रिया यांनी दोन दिवसापूर्वीच पेट्रोल आणले होते, त्यामुळे त्यांनी आत्महत्या केली असावी अशीही चर्चा होती. रिया यांना दोन मुले आहेत. ही दोन्ही मुले शाळेत गेली होती तर सासु व इतर नातेवाईक खालच्या होते.
घटनास्थळावर आढळला रॉकेलचा डबा
घटनेची माहिती मिळाल्यानंतर एमआयडीसी पोलीस स्टेशनचे उपनिरीक्षक संदीप पाटील, ससाणे, शिवदास चौधरी, दिनकर खैरनार, सचिन चौधरी व संतोष पाटील यांनी घटनास्थळ गाठले. घरात रॉकेलचा डबा, आगपेटी, चप्पल व चष्मा अशा वस्तू आढळून आल्या असून पोलिसांनी त्या जप्त केल्या आहेत. पुरावा नष्ट होऊ नये म्हणून पोलिसांनी घराला कुलुप लावून चावी स्वत: जवळ ठेवली होती.
त्यानंतर सायंकाळी सहायक पोलीस अधीक्षक डॉ.नीलाभ रोहन यांनी जिल्हा रुग्णालयात मृतदेहाची पाहणी केली व नंतर घटनास्थळी भेट दिली. दरम्यान, रिया यांच्या डाव्या कानातून रक्त आलेले होते तर काही दागिने काढून ठेवण्यात आले होते, त्यामुळे संशय अधिक बळावला आहे.
आत्महत्या नव्हे, खून केल्याचा आरोप
घटनेची माहिती मिळाल्यानंतर रिया याचे मेहुणे कैलास सचदेव व बहिणीचे सासरे होलाराम जीवनराम सचदेव (रा.भुसावळ) यांनी रिया हिचा मृत्यू हिटरच्या शॉकने किंवा आत्महत्या नाही, तो खूनच असल्याचा आरोप केला असल्याचा माहिती पोलिसांनी दिली. सासुकडून प्रचंड छळ होत होता, असे मेहुण्यांनी पोलिसांना सांगितले. पोलिसांच्या तपासातही छळ होत असल्याचे निष्पन्न झाले. दरम्यान, सासरच्या लोकांनी गीझरचा स्फोट व हिटरचा शॉक लागून मृत्यू झाल्याचे सांगितले, परंतु गिझर व हिटर जैसे थे होते, त्यामुळे सासरच्या लोकांच्या म्हणण्यात तथ्य नसल्याचे आढळून आले.
रिया हिला आई व वडील नाहीत. बहिणीच्या सासरच्यांनीच तिचा विवाह लावून दिला होता.
पेटवून घेईल व पेटवून टाकूची धमकी
माहेरच्या लोकांनी पोलिसांना दिलेल्या माहितीनुसार, रिया हिला प्रचंड त्रास होता, त्यामुळे सासुच्या छळाला कंटाळून एखाद दिवशी मी स्वत:च रॉकेट टाकून आत्महत्या करुन घेईन असे तिने अनेकवेळा बोलून दाखविले होते तर सासरच्यांनीही तुला जाळून टाकू अशी धमकी दिली होती. या घटनेत रिया हिचा जळाल्याने मृत्यू झालेला आहे, त्यामुळे तीने स्वत:हून जाळून घेतले की जाळले हा प्रश्न असून पोलीस तपास व शवविच्छेदन अहवालातच काही बाबींचा उलगडा होईल, अशी माहिती उपनिरीक्षक संदीप पाटील यांनी दिली. घटनास्थळावरील काही संशयास्पद वस्तू, सासरच्यांकडून मिळालेली माहिती व माहेरच्या लोकांचा आरोप यामुळे डॉ.नीलाभ रोहन यांनी घटनास्थळ व मृतदेहाची पाहणी केली.