बंद घराचा फायदा घेत, चोरट्यांनी मारला डल्ला

भुसावळ : बंद घराचा फायदा घेत, चोरट्यांनी रोख रक्कम आणि सोन्या-चांदीचे दागिन्यांसह एकूण ४६ हजार ८५० रुपयांचा ऐवज लंपास केला. ही घटना ४ रोजी सकाळी दहा, शहरातील इमलीपुरा भागात उघडकीस आली.

शेख फैज शेख सिराज हे ३ रोजी रात्री पत्नी व मुलांसह सासरी मुक्कामी गेले होते. ४ रोजी सकाळी ते घरी परतले, तेव्हा दरवाजाला लावलेले कुलूप तुटलेल्या अवस्थेत जमिनीवर पडलेले दिसले. घरात जाऊन पाहिले असता, लोखंडी कपाटाचे दोन्ही दरवाजे उघडे होते व त्यातील सामान कपडे जमिनीवर अस्ताव्यस्त पडलेले दिसले. कपाटातील तिजोरीत ठेवलेली रोख रक्कम व सोन्या-चांदीच्या वस्तूंची चोरी झाल्याचे कळले. यात २० हजार रुपयांची रोख रक्कम, १३ हजार ३५० रुपयांची सोन्याची अंगठी, १ हजाराची चांदीची अंगठी, ३ हजारांची दीड ग्रॅम वजनाची लहान मुलाची सोन्याची अंगठी, २ हजार रुपयांचे आठ तोळे वजनाचे सहा जोडी चांदीचे कडे, ७ हजार ५०० रुपयांचे ४ ग्रॅमची सोन्याची कानातील रिंग असा एकूण ४६,८५० रुपयांचा ऐवज लंपास केला आहे.