२६ बोटांच्या बाळाला मातेने दिला जन्म! वैद्यकीय इतिहासातील दुर्मिळ घटना

आतापर्यंत आपण २१ किंवा २२बोटे असलेले मुले जन्माला आली असल्याचे ऐकले असेल.  

वासुदेव सरोदे

फैजपूर जि. जळगाव : आतापर्यंत आपण २१ किंवा २२बोटे असलेले मुले जन्माला आली असल्याचे ऐकले असेल.  न्हावी ता. यावल येथील ग्रामीण रुग्णालयात तब्बल २६ बोटांच्या बाळाचा जन्म झाला आहे. या नवजात बाळाला दोन्ही  हाताला एक- एक तर दोन्ही  पायाला तब्बल दोन- दोन बोटे जास्त आहेत.  बाळ व बाळाची आई सुखरूप आहेत.  ही वैद्यकीय इतिहासातील  दुर्मिळ घटना असल्याचे अनेक डॉक्टरांचे मत आहे. 

मध्य प्रदेशातील झिरन्या जि. खरगोन येथील रहिवासी असलेल्या ज्योती बारेला या २० वर्षीय  महिलेला  शनिवारी मध्यरात्री न्हावी ग्रामीण रुग्णालयात दाखल करण्यात आले. डॉक्टरांच्या पथकाने गरोदर मातेची वैद्यकीय तपासणी केली व परिश्रम घेऊन ज्योती बारेला याची  पहाटे ३:३२मिनिटांनी यशस्वी प्रसूती केली. 

 जन्माला आलेल्या या बाळाला पाहून उपस्थित सर्वच अवाक झाले कारण या बाळाच्या हातापायाला तब्बल २६ बोटे होती. सामान्यतः हातापायाचे मिळून २० बोटे असतात मात्र हे बाळ चक्क २६ बोटांचे आहे. 

या नवजात बालकाच्या दोन्ही हाताला प्रत्येकी सहा बोटे व दोन्ही पायाला प्रत्येकी सात बोटे असल्याने सर्वच अचंबित झाले. या बालकाला पाहण्यासाठी अनेकांनी रुग्णालयात गर्दी केली होती.  सद्यस्थितीत माता व बालक या दोघांची प्रकृती ठणठणीत आहे. न्हावी ग्रामीण रुग्णालयाचे वैद्यकीय अधिकारी डॉ. कौस्तुभ तळले, परिचारिका कोमल आदिवाले, सुमित बारसे, सरला परदेशी, पौर्णिमा कोळंबे, अरुण पाटील यांनी या महिलेच्या सुखरुप प्रसूतीसाठी परिश्रम घेतले.

दुर्मिळ घटना

आतापर्यंत २१-२२ ते २४ बोटांचे बाळ जन्माला आल्याचे ऐकून  आहे.  तब्बल २६ बोटांचे बाळ जन्माला येणे ही वैद्यकीय इतिहासातील अतिशय दुर्मिळ घटना आहे,असे मत ग्रामीण रुग्णालयाचे डॉ, कौस्तुभ तळले व सावदा येथील बालरोग तज्ज्ञ डॉ. राजेश चौधरी यांनी व्यक्त केले.