मुंबईला ईद साजरी करण्यासाठी गेलेल्या कुटुंबाच्या घरात चोरी

अय्युब दिलावर खान हे पत्नीसह रविवारी मुंबई येथे नातेवाईकांकडे ईद साजरी करण्यासाठी गेले होते. त्यामुळे त्यांचे गेंदालाल मिल येथील घर कुलूप बंद होते.

जळगाव : मुंबईतील नातेवाईकाकडे ईद साजरी करण्यासाठी गेलेल्या अय्युब दिलावर खान यांचे बंद घर फोडून चोरट्यांनी सोन्याच्या अंगठ्यासह टीव्ही व रोकड असा एकूण ५० हजार रूपयांचा ऐवज चोरून नेल्याची घटना मंगळवारी सकाळी ८.३० वाजेच्या सुमारास गेंदालाल मिल येथे उघडकीस आली आहे. याप्रकरणी शहर पोलिसात गुन्हा दाखल करण्यात आला आहे.

अय्युब दिलावर खान हे पत्नीसह रविवारी मुंबई येथे नातेवाईकांकडे ईद साजरी करण्यासाठी गेले होते. त्यामुळे त्यांचे गेंदालाल मिल येथील घर कुलूप बंद होते. हीच संधी साधून चोरट्यांनी त्यांच्या घरात चोरी केली. मंगळवारी सकाळी त्यांची गेंदालाल मिल येथे राहणारी मुलगी तंजिला हिच्या लक्षात चोरीची घटना आल्यानंतर तिने लागलीच भाऊ अल्तमश खान याला फोन करून माहिती दिली. नंतर दोघांनी वडीलांचे घर गाठल्यावर त्यांना घराचा दरवाजा उघडा तर हॉलमधील टीव्ही चोरीला गेलेला दिसला. तर आतल्या खोलीतील कपाट फोडून चोरट्यांनी त्यातील सामान अस्ताव्यस्त फेकलेले दिसले. तसेच कपाटातील ३५ हजार रूपयांची रोकड आणि ८ हजार रूपये किंमतीच्या लहान ४ सोन्याच्या अंगठ्या चोरीला गेलेले दिसले. अल्तमश खान याने लागलीच शहर पोलिस ठाणे गाठून तक्रार दिली. त्यानुसार गुन्हा दाखल करण्यात आला आहे.