उघड्या घरातून चोरटा मोबा‌इल, रोकड घेऊन पळाला

जळगाव : औद्यागिक वसाहतीतील यश इंडस्ट्रीज येथील नूर मेहंदी हसन यांच्या खोलीतून अज्ञात चोरट्याने तीन मोबाइल व २६ हजार ५०० रुपयांची रोकड लांबविल्याची घटना रविवारी मध्यरात्री ३ वाजता उघडकीस आली. याप्रकरणी एमआयडीसी पोलीस ठाण्यात गुन्हा दाखल आहे.

नूर हसन यांच्यासह त्यांचा भाऊ शाहीद अली, अब्दुल मेहंदी हसन व जैेनुल आपुद्दीन हे औद्यागिक वसाहतीतील एका चटई कंपनीत कामाला आहेत. चौघे यश इंडस्ट्रीजच्या एका खोलीत वास्तव्यास आहेत. रविवारी रात्री १ वाजता संपूर्ण काम आटोपून झोपी गेले होते. यादरम्यान खोलीचा दरवाजा उघडा असल्याची संधी साधत चोरट्याने त्यांच्या खोलीतून तीन मोबाइल व २६ हजार ५०० रुपयांची रोकड चोरून नेली. दरम्यान, मध्यरात्री ३ वाजता जैनुल आपुद्दीन याला जाग आल्यानंतर त्याला खोलीतून चोरटा पळताना दिसून आला. त्यांनी लागलीच नूर याला उठवून घरात चोरी झाल्याचे सांगितले. खोलीची पाहणी केली असता, त्यावेळीत तीन मोबाइल व शाहीद यांच्या पँटच्या खिशातील रोकड चोरीला गेल्याचे दिसून आले.

अंधाराचा फायदा घेत चोरटा पसार

नूर हसन यांच्या इतरांनी खोलीच्या बाहेर धाव घेऊन चोरट्याचा शोध घेतला. काहीवेळ शोध घेऊन सुद्धा तो मिळून आला नाही. सोमवारी नूर यांनी एमआयडीसी पोलीस ठाणे गाठत रात्री घडलेल्या संपूर्ण प्रकार पोलिसांना सांगितला. चोरटा सुमारे चाळीस वर्षे वयोगटांतील असून, काळे जॅकेट व काळी पँट घातलेली असल्याचे त्यांनी पोलिसांना सांगितले. त्यानंतर याप्रकरणी एमआयडीसी पोलीस ठाण्यात गुन्हा दाखल करण्यात आला आहे.