आदिवासी मुलीवर अत्याचार : एकास अटक

मुक्ताईनगर : कर्की शिवारातील घटना

मुक्ताईनगर : तालुक्यातील कर्की शिवारातील केळी बागेत आठ वर्षीय अल्पवयीन आदिवासी मुलीवर अत्याचार केल्याची घटना १५ रोजी घडली. या प्रकरणी एका तरुणा विरुद्ध गुन्हा दाखल करण्यात आला आहे. त्याला अटक करण्यात आली आहे.
पोलिसांनी दिलेल्या माहितीवरून कर्की शिवारातील केळी बागेत आरोपी प्रवीण राजू निंबाळकर ( वय २२ ) रा. कर्की याने अल्पवयीन मुलीला बागेत नेवून तिच्यावर बळजबरीने १५ रोजी सकाळी ८ ते १२ वाजे दरम्यान अत्याचार केला.
घटना समजताच पोलीस निरीक्षक सुरेश शिंदे, उपनिरीक्षक नीलेश सोळुंके व पोलीस कर्मचाऱ्यांनी घटना स्थळी धाव घेवून आरोपी प्रवीणला गावातून ताब्यात घेतले. याप्रकरणी पीडित मुलीच्या वडिलांच्या फिर्यादीवरून पोलिसात प्रवीण निंबाळकर याच्याविरुद्ध बलात्कार व पोस्को कायद्याअंतर्गत गुन्हा दाखल करण्यात आला आहे. तपास पोलीस निरीक्षक सुरेश शिंदे करीत आहेत.
३ वर्षांपासून मजुरीसाठी आलेले गोंडवाडी जि. खंडवा येथील पीडित मुलीचे कुटुंबीय यात पती-पत्नी दोन मुली मुलगा असा परिवार राहत होता. १५ रोजी सकाळी आठ वाजता कुटुंब प्रमुख, पत्नी, मुलगी, मुलगा यांच्यासह गावातीलच शेतात मजुरी कामासाठी गेले होते. त्यांची मुलगी घरातच होती. संधी पाहून प्रवीण निंबाळकर याने मुलीचे तोंड दाबून घरासमोरील केळीच्या शेतात नेवून तिच्यावर अत्याचार केला.