यावल तालुक्यातील डांभुर्णी येथे अपघात, चांदसर येथील दोन जण ठार

किनगाव-डांभुर्णीमार्गे जळगावला जात असलेली रुग्णवाहिका व जळगावकडून येत डांभुर्णीकडे येत असलेल्या मोटारसायकलची समोरासमोर धडक होऊन झालेल्या अपघातात मोटारसायकलवरील दोन जण जागीच ठार झाले आहेत.

ठळक मुद्देरूग्णवाहिका चालक घटनास्थळावरून पसारमोटारसायकल आणि रुग्णवाहिका यांची समोरासमोर धडक

यावल/डांभुर्णी, जि.जळगाव : किनगाव-डांभुर्णीमार्गे जळगावला जात असलेली रुग्णवाहिका व जळगावकडून येत डांभुर्णीकडे येत असलेल्या मोटारसायकलची समोरासमोर धडक होऊन झालेल्या अपघातात मोटारसायकलवरील दोन जण जागीच ठार झाले आहेत. ठार झालेल्यांची नावे समाधान भाऊलाल कोळी व अंकुश श्याम कोळी अशी आहेत. दोघेही चांदसर, ता.धरणगाव येथील रहिवाशी आहेत. ही घटना शुक्रवारी दुपारी तीन वाजेच्या सुमारास डांभुर्णी पेट्रोल पंपाजवळ घडलीे.
घटनेचे वृत्त कळताच येथील पोलीस ठाण्याचे फौजदार ढोमणे व सहकारी घटनास्थळाकडे रवाना झाले. रूग्णवाहिका चालक घटनास्थळावरून पसार झाला आहे.
तालुक्यातील सौखेडासीम येथील प्राथमिक आरोग्य केंद्राची रुग्णवाहिका (क्रमांक एमएच-१९-एम-९२०५) ही रुग्णास जळगाव येथे नेत होती. तेव्हा डांभुर्णी गावाजवळील पेट्रोलपंपाजवळ जळगावकडून येत असलेली मोटार सायकल (क्रमांक एमएच-३९ -बी-२२९३) यांची व रूग्णवाहिकेची जोरदार धडक झाली. धडक एवढी मोठी होती की, मोटारसायकलवरील दोघेही जण जागीच ठार झाले. दोघांचे मृतदेह जळगाव येथे नेण्यात आले आहेत.
घटनेचे वृत्त कळताच यावलचे फौजदार ढोमणे व सहकारी घटनास्थळी पोहोचले. येथील पोलीस ठाण्यात रुग्णवाहिका चालकावर गुन्हा दाखल करण्यात आला असून चालक पसार आहे.