राष्ट्र रक्षणासाठी संघटित व्हा...

जळगाव : भविष्यात मोठ्या संघर्षांना तोंड द्यावे लागणार आहे. त्यामुळे राष्ट्र रक्षणासाठी संघटित व्हा, असे प्रतिपादन हिंदू राष्ट्र सेनेचे संस्थापक अध्यक्ष धनंजय देसाई यांनी केले.

आदर्श व्यक्तिमत्त्व तसेच भारतीय संस्कृतीचे श्रेष्ठत्व या विषयावर केमिस्ट भवन येथे गुरुवारी सायंकाळी ७ वाजता हिंदू राष्ट्र सेनेतर्फे कार्यक्रमाचे आयोजन केले होते. त्यावेळी ते बोलत होते. कार्यक्रमाच्या सुरुवातीला धनंजय देसाई व अप्पासाहेब देसाई यांच्याहस्ते छत्रपती शिवाजी महाराज यांच्या प्रतिमेचे पूजन करण्यात आले. त्यानंतर प्रेरणामंत्र म्हणण्यात आले. यावेळी जिल्हाभरातून स्वयंसेवकांची उपस्थिती होती.

तांडव या वेबसिरिजमधून हिंदू देवी-देवतांचा अवमान केला गेला आहे. या वेबसिरिजच्या निर्मात्याने जरी तोंडाने माफी मागितली, मात्र त्याच्या मनातील विष हे तांडव या वेबसिरीजमधून उतरविले आहे. त्यामुळे आपण त्याचा निषेध करतो, असेही धनंजय देसाई यांनी सांगितले. दिल्लीत शेतकऱ्यांचे आदांलन सुरू आहे. यामध्ये शेतकऱ्यांची मुखवटे घालून काही समाजकंटक सहभागी झाल्याचा आरोप त्यांनी केला.