अर्थसंकल्पावर आज विद्यापीठाची अधिसभा

जळगाव : कवयित्री बहिणाबाई चौधरी उत्तर महाराष्ट्र विद्यापीठाच्या अधिसभेची ऑनलाइन बैठक प्रभारी कुलगुरू प्रा.ई. वायुनंदन यांच्या अध्यक्षतेखाली मंगळवार, २९ जून रोजी सकाळी ११ वाजता आयोजित करण्यात आली आहे. यापूर्वी २५ मार्च रोजी अधिसभेची बैठक ऑनलाइन आयोजित करण्यात आली होती. मात्र, ती तहकूब झाल्यामुळे ही सभा आता मंगळवारी सकाळी ११ वाजता ऑनलाइन होणार असल्याची माहिती प्रभारी कुलसचिव डॉ.श्यामकांत भादलीकर यांनी दिली. या बैठकीत विद्यापीठाचा सन २०२१-२२चा अर्थसंकल्प मांडला जाणार आहे.

------

डॉ.कमलाबाई सोहनी यांची पुण्यतिथी साजरी

जळगाव : केसीई सोसायटीच्या शिक्षणशास्त्र आणि शारीरिक शिक्षणशास्त्र महाविद्यालय येथे भारतातील पहिल्या महिला पीएच.डी संपादन करणाऱ्या डॉ.कमलाबाई सोहनी यांची पुण्यतिथी साजरी करण्यात आली. यावेळी उच्चशिक्षण सहसंचालक प्रा.सतीश देशपांडे, प्रभात चौधरी यांच्या हस्ते प्रतिमापूजन करण्यात आले. त्यानंतर, प्राचार्य अशोक राणे यांनी सोहनी यांच्या जीवनातील विविध प्रसंग स्पष्ट केले. या कार्यक्रमास प्राचार्य डॉ.नाना गायकवाड, प्राचार्य यादव सनेर, प्राचार्य लता मोरे, डॉ.आरती सपकाळे, डॉ.शैलजा भंगाळे आदी उपस्थित होते.