नंबरप्लेट बदल करून चोरीच्या दुचाकीचा वापर

जळगाव : दुचाकी चोरी करायच्या व नंबरप्लेट बदल करून दुचाकीचा वापर करणाऱ्या जीवन सुकदेव ठाकरे (वय २२) व पवन सुनील कोळी (वय २०) दोन्ही रा. डांभुर्णी, ता.यावल या चोरट्यांचा शहर पोलिसांनी मंगळवारी पर्दाफाश केला आहे. दोघांना अटक करण्यात आली असून, त्यांच्याकडून चोरीच्या दोन दुचाकी हस्तगत करण्यात आल्या आहेत. याप्रकरणी शहर पोलीस ठाण्यात गुन्हाही दाखल करण्यात आला आहे.

शिवाजी नगरातील चंद्रकांत गजानन बोदवडे यांची दुचाकी (क्र.एम.एच १९ सीजी ३५६५)१२ सप्टेंबर २०१९ रोजी शहरातील नेहरु पुतळ्याजवळील बँकेजवळून चोरी झाली होती. गणेश विसर्जनाच्या दिवशी ही दुचाकी चोरी झाली होती. बोदडे हे दुचाकी लावून गणपती विसर्जनासाठी मिरवणुकीत गेले होते. याप्रकरणी शहर पोलीस ठाण्यात चोरट्यांविरोधात गुन्हा नोंदविण्यात आला होता.

पेट्रोलिंगदरम्यान चौकशीत फुटले बिंग

शहर पोलीस ठाण्याचे कर्मचारी भास्कर ठाकरे, गणेश पाटील, ओम पंचलिंग व नीलेश पाटील हे १४ डिसेंबर रोजी शिवाजी नगरातील स्मशानभूमीजवळ पेट्रोलिंग करत असताना दोन जण दुचाकीवर आले. पोलिसांनी त्यांना अडवून चौकशी केली असता, त्यांच्या बोलण्यात गोंधळ उडत होता. संशय बळावल्याने वाहन परवाना व कागदपत्रांची मागणी केली असता, अधिकच संशय आला. त्यामुळे दोघांना पोलीस निरीक्षक धनंजय येरुळे यांच्याकडे नेण्यात आले. तेथे सहायक फौजदार वासुदेव सोनवणे, विजय निकुंभ, भास्कर ठाकरे, अक्रम शेख, प्रफुल्ल धांडे, रतन गीते व गणेश पाटील यांनी चौकशी केली असता त्यांनी दुचाकी चोरीची कबुली देऊन त्यावरील नंबरदेखील बनावट असल्याचे सांगितले. दरम्यान, या दोघांसोबत आणखी एक साथीदार असल्याचे निष्पन्न झाले आहे; मात्र तो फरार आहे. अधिकच्या चौकशीत त्यांनी आणखी एक दुचाकी काढून दिली.