लस आली आणि संपली

जळगाव : कोरोना प्रतिबंधक लसीकरण मोहीम लसीचा पुरेसा साठा उपलब्ध होत नसल्याने कधी सुरू तर कधी बंद, अशा अवस्थेत राबवली जात आहे. दोन दिवसांपासून शहरातील लसीकरण केंद्र डोस नसल्यामुळे बंद होते. तिसऱ्या दिवशी दहा केंद्र सुरू झाले. मात्र, पुन्हा लसीचा तुटवडा झाल्यामुळे यातील सात केंद्र बंद झाले असून, शुक्रवारी शहरातील केवळ तीन केंद्रांवर लसीकरण होणार आहे. दरम्यान, कोविशिल्ड लसीचे १६००० डोस शनिवारपर्यंत केंद्रांना प्राप्त होण्याची शक्यता वर्तविण्यात आली आहे.

शहरातील स्वाध्याय भवन आणि कांताई नेत्रालय या केंद्रांवर कोवॅक्सिन लसीचा दुसरा डोस दिला जात असल्याने या केंद्रांवर काही प्रमाणात गर्दी होती. मात्र, या केंद्रांवरील कोवॅक्सिन लसीचे डोस संपल्याने ही केंद्रे शुक्रवारी बंद राहणार आहेत. गुरुवारी अन्य सर्व केंद्रांवर कोविशिल्ड लसीचे ४५ वर्षांवरील नागरिकांसाठी दुसरा डोस प्राधान्य व पहिला डोस अशाप्रकारे केंद्रांवर लसीकरण सुरू होते.

शुक्रवारी छत्रपती शाहू महाराज रुग्णालय, डी. बी. जैन रुग्णालय आणि शाहीर अमर शेख हॉस्पिटल या ठिकाणीच लसीकरण सुरू राहणार आहे, अशी माहिती प्रमुख वैद्यकीय अधिकारी डॉक्टर राम रावलानी यांनी दिली. जिल्हा रुग्णालयाचे रोटरी भवन आणि रेड क्रॉस सोसायटी केंद्रात ही लस उपलब्ध नसल्याने बंद राहणार असल्याची माहिती देण्यात आली आहे.

तीन खासगी केंद्रांना परवानगी

खासगी केंद्रांना थेट कंपन्यांशी संपर्क करून लस विकत घेता येणार असून, अशा ३१ केंद्रांना गेल्या आठवड्यात प्रशासनाकडून परवानगी देण्यात आली होती. यात आणखी तीन केंद्रे वाढविण्यात आली असून, या केंद्रांची संख्या ३४ वर पोहोचली आहे. या तीन नवीन केंद्रांमध्ये डॉ. उल्हास पाटील वैद्यकीय महाविद्यालय व रुग्णालय तसेच अन्य दोन केंद्रांचा समावेश आहे.