गावठी दारूचे अड्डे उद्ध्वस्त

जळगाव : शनिपेठ पोलीस ठाण्याच्या पथकाने सोमवारी सायंकाळी विशेष मोहीम राबवत कांचन नगर आणि कोळी पेठ परिसरातील गावठी दारूच्या हातभट्ट्या उद्ध्वस्त केल्या. यावेळी गावठी दारू, रसायनासह साडेचार हजार रूपयांचा मुद्देमाल जप्त करण्यात आला. या प्रकरणी शनिपेठ पोलीस ठाण्‍यात गुन्हा दाखल करण्‍यात आला आहे.

शहरातील कांचन नगर व कोळी पेठ परिसरात अवैध दारूच्या हातभट्ट्या सुरू असल्याची माहिती शनिपेठ पोलिसांना मिळाली होती. सोमवारी सायंकाळी शनिपेठ पोलीस ठाण्‍याचे पीएसआय खेमचंद परदेशी यांच्यासह पोलीस कर्मचारी रवींद्र पाटील, मनोज येवूलकर यांनी कांचन नगरातील अवैध हातभट्टीवर सायंकाळी ६ वाजता धाड टाकली. तेथून दोन हजार रूपयांचा मुद्देमाल जप्त करून हातभट्टया उद्ध्वस्त करण्‍यात आल्या. त्यानंतर सायंकाळी ६.४५च्या सुमारास पथकाने कोळी पेठ परिसरातील अवैध हातभट्टीवर धाड टाकली. तेथे कारवाई करत २ हजार ४०० रूपयांचा मुद्देमाल जप्त करण्यात आला. या प्रकरणी शनिपेठ पोलीस ठाण्‍यात गुन्हा दाखल करण्‍यात आला आहे.