वडगाव बु. येथील ३ वर्षाच्या बालकाचा अपहरण करुन खून?

तीन वर्षाच्या बालकाचे अपहरण करून खून करण्यात आल्याची घटना वडगाव हायस्कूलजवळ उघडकीस आली आहे.

ठळक मुद्देवडगाव हायस्कूलजवळ विहिरीत सापडला मृतदेह

लोकमत न्यूज नेटवर्क

भडगाव : तालुक्यातील वडगाव सतीचे येथील प्लॉट एरियातील एका तीन वर्षाच्या निरागस बालकांचे अपहरण झाल्याचे वृत्त असतानाच ‘त्या’ बालकांचा मृतदेह वडगाव हायस्कूलजवळ दिलीप जाधव यांच्या शेतातील विहिरीत आढळल्याने परिसरात खळबळ उडाली आहे.

तालुक्यातील वडगाव बु. येथील भिल्ल समाजाच्या कुटुंबातील दिपक गायकवाड यांचा मुलगा आयुष दिपक गायकवाड (३, रा. वडगाव सतीचे, ता. भडगाव) हा मुलगा वडगाव सतीचे गावावरून दि. १४ रोजी दुपारी ३ वाजेच्या सुमारास बेपत्ता झाला होता. त्याचा मृतदेह वडगाव हायस्कूलजवळील दिलीप जाधव यांच्या शेतातील विहीरीत रात्री १०:३० वाजता आढळून आल्याच्या घटनेने परिसरात हळहळ व्यक्त करण्यात येत आहे.

याबाबत दि. १४ रोजी भडगाव पो. स्टे ला अपहरणाचा गुन्हा दाखल करण्यात आला आहे. या बालकाचा मुत्यू कसा झाला? याबाबतचे मुत्यूचे कारण अद्यापावेतो अस्पष्ट जरी असले तरी सशंयित आरोपी म्हणून भडगाव पोलिसांनी एकास ताब्यात घेतले आहे. याबाबत पुढील तपास भडगांव पोलिस करीत आहे. या घटनेबाबत रात्री उशीरापर्यंत भडगाव पोलिस स्टेशनला गुन्हा दाखल करण्याचे काम सुरू होते. घटनास्थळी रात्री ११ वाजता पाचोरा विभागाचे डिवायएसपी ईश्वर कातकडे, भडगाव पोलिस निरिक्षक अशोक उतेकर यांच्यासह पो. हे. कॉ. कैलास गिते, पो. ना. लक्ष्मण पाटील, ईश्वर पाटील, स्वप्निल चव्हाण, नितिन रावते यांनी भेट देऊन घटनास्थळाचा पंचनामा केला आहे.