नगरविकास मंत्र्यांशी चर्चा करून गाळेप्रश्न मार्गी लावू

लोकमत न्यूज नेटवर्क

जळगाव : शहरातील गाळेधारकांच्याच प्रश्नाप्रमाणे अकोला येथील गाळेधारकांचाही सारखाच प्रश्न होता. मात्र, ज्या प्रमाणे अकोला महापालिकेतील गाळेधारकांचा प्रश्न मार्गी लावण्यात आला. त्याचप्रमाणे जळगाव महापालिकेतील गाळेधारकांचा प्रश्न देखील मार्गी लावण्यात येईल, तसेच याबाबत नगरविकास मंत्री एकनाथ शिंदे यांच्याशी देखील चर्चा करणार असल्याचे आश्वासन कॉग्रेसचे प्रदेशाध्यक्ष नाना पटोले यांनी गाळेधारकांना दिले आहे.

गेल्या आठवडाभरापासून शहरातील मुदत संपलेल्या मार्कटमधील गाळेधारकांनी मनपा प्रशासनाविरोधात साखळी उपोषण पुकारले आहे. बुधवारी कॉग्रेसचे प्रदेशाध्यक्ष नाना पटोले यांनी गाळेधारकांची भेट घेतली. यावेळी आमदार शिरीष चौधरी, माजी खासदार डॉ.उल्हास पाटील, गाळेधारक संघटनेचे अध्यक्ष डॉ.शांताराम सोनवणे, पांडूरंग काळे, राजस कोतवाल, तेजस देपुरा, पंकज मोमाया यांच्यासह काही गाळेधारक उपस्थित होते. यावेळी डॉ.शांताराम सोनवणे यांनी पटोले यांनी सर्व माहिती दिली. त्यानुसार शासनाकडे पाठपुरावा करून, याप्रश्नी मार्ग काढण्याचा प्रयत्न करण्यात येईल असे पटोले यांनी सांगितले. तसेच पुढील काही दिवसात मुंबईत येवून याबाबत प्रत्यक्ष चर्चा करण्याचे निमंत्रण देखील पटोले यांनी गाळेधारकांना दिले.