'मामी सोबत का फिरतोय' विचारताच केला लोखंडी पट्टीने वार

जळगाव : 'मामी सोबत का फिरत आहे? याचा जाब विचारल्याचा राग येऊन एकाने अरविंद मुकेशकुमार कुकरेजा (२९, रा़ बाबानगर, सिंधी कॉलनी) या तरूणावर लोखंडी पट्टीने वार करून जखमी केले. ही घटना गुरूवारी रात्री ९ वाजता बाबा नगरात घडली. याप्रकरणी तरूणाच्या फिर्यादीवरून एमआयडीसी पोलिसात गुन्हा दाखल करण्यात आला आहे.

अरविंद कुकरेजा हे सिंधी कॉलनी भागातील बाबा नगरात वास्तव्यास आहेत. त्यांच्या घरामागे त्यांचे मामा राहतात. गुरूवारी रात्री ९ वाजता अरविंद हे सिंधी कॉलनी उभे असताना, त्यांच्या मामी सोबत कमलेश भुदलदास चिमराणी हा दुचाकीवर सिंधी कॉलनीकडून बाबानगरकडे जात होता. नंतर कमलेश हा त्याच्या घराजवळ थांबला. अरविंद यांनी तेथे जावून कमलेश याला मामी सोबत का फिरत आहे, असा जाब विचारला. याचा राग येवून कमलेशने अरविंद यांच्या हातावर लोखंडी पट्टीने वार केला. त्यात गंभीर इजा झाल्याने हातातून रक्तस्त्राव होवू लागला. तितक्यात कमलेश याची बहिण त्याठिकाणी आली व तिनेही अरविंद याला मारहाण केली. मुलाला मारहाण होत असल्यामुळे भांडण सोडविण्यासाठी आलेल्या कुकरेजा कुटुंबीयांना दोन्ही भाऊ, बहिणीने मारहाण केली. घटनेनंतर अरविंद याने एमआयडीसी पोलीस ठाण्याकडे धाव घेतली. मात्र, हाताला गंभीर इजा झाल्यामुळे त्यांना लागलीच पोलिसांनी पुढील उपचारासाठी जिल्हा रूग्णालयात पाठविले. उपचार घेतल्यानंतर अरविंद यांच्या फिर्यादीवरून कमलेश चिमराणी व त्याच्या बहिणीविरूध्द गुन्हा दाखल करण्यात आला आहे.