चोरासोबतच्या झटापटीत महिला जखमी

महिला व आरोपी यांच्यात झटापट होऊन आरोपीने महिलेच्या डोक्यावर कोयत्याने वार केला.

ऑनलाइन लोकमत

फैजपूर/बामणोद, जि. जळगाव, दि. 23 -  घराच्या गच्चीवर झोपलेल्या महिलेच्या कानातील सोन्याचे रिंग काढण्याचा प्रयत्न करणा:या आरोपीचा प्रतिकार केला असता  महिला व आरोपी यांच्यात झटापट होऊन आरोपीने महिलेच्या डोक्यावर कोयत्याने वार केला.  त्यात ती  महिला गंभीर जखमी झाली. 
याप्रकरणी  चोरीचा प्रयत्न म्हणून आरोपी जिगर बारेला याच्याविरुद्ध गुन्हा दाखल करण्यात येऊन  अटक करण्यात आली.
बामणोद येथील रेखा राजेंद्र भोळे (वय 39) या  मुलासह घराच्या गच्चीवर झोपल्या असताना रात्री 10.30 वाजेच्या सुमारास गावातीलच जिगर बारेला (वय 24, ह.मु.बामणोद,  मुळ.रा.सिमोट म.प्र.) याने गच्चीवर जावून रेखा भोळे यांच्या कानातील सोन्याच्या रिंग काढण्याचा प्रयत्न केला.  त्यावेळी महिलेने आरोपीचा प्रतिकार केला.  आरोपी  बारेला याने भोळे यांच्या डोक्यावर जवळील कोयत्याने वार केले त्यात त्या गंभीर जखमी झाल्या. रेखा भोळे यांनी पोलिसात खबर दिल्यावरून आरोपी जिगर बारेला विरुद्ध भादंवि कलम 394 प्रमाणे जबरी चोरीचा प्रयत्न केल्याप्रकरणी गुन्हा दाखल करण्यात येवून त्याला अटक करण्यात आली. तपास सहाय्यक पोलीस निरीक्षक सार्थक नेहेते, फौजदार मनोहर मोरे, हेड कॉन्स्टेबल अरुण जाधव, रमण सुरळकर करीत आहे.