शहराच्या समस्या कायम ठेवणारे वर्ष

लोकमत न्यूज नेटवर्क

जळगाव : मनपात सत्तेत आलेल्या भाजपकडून वर्षभराच्या आत विकासाचा दावा करण्यात आला होता. पहिले वर्ष भाजपच्या गटबाजीतच वाया गेल्यानंतर ‘२०२०’ हे वर्ष जळगावकरांच्या अडचणी दुर करणारे ठरेल अशी अपेक्षा होती. मात्र, २०२० च्या सुरुवातीला ज्या समस्यांना जळगावकर सामोरे जात होते. त्याच समस्या हे वर्ष समारोपाच्यावेळेसही कायम आहे. त्यामुळे आगामी वर्षात तरी जळगावकरांच्या समस्यांचे ग्रहण सुटून, सत्ताधारी भाजप आपले आश्वासन पुर्ण करेल अशी आशा जळगावकरांना लागून आहे.

महापौर बदलानंतरही समस्या कायम

जानेवारी २०२० मध्ये सीमा भोळ यांनी महापौरपदाचा राजीनामा दिल्यानंतर भारती सोनवणे यांची महापौरपदी निवड करण्यात आली. मात्र, महापौर बदललानंतरही शहराच्या समस्या कायम आहेत.

गो गो वॉटरग्रेस अन‌् कम, कम वॉटरग्रेस

फेब्रुवारी महिन्यात शहराच्या सफाईचे काम पाहणाऱ्या वॉटरग्रेस कंपनीच्या कामाबाबत सर्वच पक्षातील नगरसेवकांकडून आलेल्या तक्रारीनंतर वॉटरग्रेसकडून काम थांबविण्यात आले. सर्वपक्षीय नगरसेवकांनी एका सुरात ‘गो वॉटरग्रेस, गो’ च्या घोषणा देत आंदोलन केले. मात्र, ऑगस्ट महिन्यात वॉटरग्रेस कंपनीला सर्वपक्षीय नगरसेवकांनी पायघड्या घालत, पुन्हा संधी दिली.

टेकाळे गेले कुलकर्णी आले

महापालिकेच्या प्रशासनातही अनेक फेरबदल झाले. मनपा आयुक्त उदय टेकाळे ३१ जानेवारी रोजी सेवानिवृत्त झाल्यानंतर मार्च महिन्यात सतीश कुलकर्णी मनपाचे आयुक्त म्हणून रुजू झाले. दरम्यान, उत्कर्ष गुट्टे, अजित मुठे व मिनीनाथ दंडवते यांचीही बदली झाली. एकाच वेळी प्रमुख अधिकाऱ्यांचा बदल्या झाल्यामुळे मनपातील प्रशासकीय पोकळी निर्माण झाली.

उपायुक्तांनी दाखल केला, महापौर पतींवर गुन्हा

शहराच्या कचऱ्याच्या प्रश्नावर महापौर पती कैलास सोनवणे यांचा उपायुक्त मिनीनाथ दंडवते यांच्याशी खटके उडाले. उपायुक्तांनी कैलास सोनवणे यांच्यावर शिवीगाळ केल्याचा आरोप करत, सोनवणे यांच्या विरोधात गुन्हा दाखल केला. काही महिन्यातच उपायुक्त दंडवते यांची मनपातून बदली देखील झाली.

कोरोनाच्या काळात मनपा वैद्यकीय कर्मचारी सरसावले

मार्च महिन्यात कोरोनाचा प्रादुर्भाव झाल्यानंतर मनपाची सर्व यंत्रणा कोरोनाच्या लढ्यात पुढे सरसावली. मनपा वैद्यकीय विभागाच्या टीमने या संकटकाळात ठामपणे जळगावकरांची सेवा बजावली. महापौर भारती सोनवणे व त्यांचे पती कैलास सोनवणे यांनीही कोरोनाच्या संकटकाळात जळगावकरांना धीर देण्याचा प्रयत्न केला. या संकटकाळात नेहमी भांडत असलेले सत्ताधारी व विरोधकांनी एकत्र येवून मनपा प्रशासनाला साथ दिली.

उपमहापौरांचा राजीनामा, खडकेंना संधी

उपमहापौर डॉ.अश्विन सोनवणे यांनी ऑक्टोबर महिन्यात आपल्या पदाचा राजीनामा दिल्यानंतर पक्षाने सुनील खडके यांना संधी देत, खडके यांची उपमहापौरपदी बिनविरोध निवड झाली. यासह स्थायी समिती सभापतीपदी राजेंद्र घुगे-पाटील यांची निवड झाली. वॉटरग्रेसकडून ६० नगरसेवकांना हप्ते दिल्याचा अभिषेक पाटील यांच्या आरोपावरूनही मनपातील वातावरण ढवळून निघाले.