रेल्वेसमोर स्वत:ला झोकून देत तरूणाची आत्महत्या

फोटोवरून पटली ओळख

जळगाव : रिंगणगाव (ता़ एरंडोल) येथील गजानन सुकलाल महाजन (३५) या तरूणाने गितांजली एक्सप्रेस समोर स्वत: ला झोकून देत आत्महत्या केल्याची घटना पिंप्राळा रस्त्यावरील बजरंग बोगद्यावरील रेल्वे रुळावर घडली़ याप्रकरणी लोहमार्ग पोलिसात अकस्मात मृत्यूची नोंद करण्यात आली आहे़ त्याच्या आत्महत्येचे कारण समजून आलेले नाही़
गजानन महाजन हा आई-वडील पत्नी व मुलासह रिंगणगाव येथे वास्तव्यास होता़ बांभोरी गावाजळील खुबचंद सागरमल पेट्रोल पंपाजवळ पंक्चरचे दुकान लावून घराचा उदरनिर्वाह करीत होता़ शुक्रवारी सकाळी दुकानावरील सहकार्याला मी चारचाकीचा लिलाव आहे तेथे जावून येतो, तोपर्यंत दुकान उघड असे सांगितले़
त्यानंतर गजानन हा दुकानावर आला नाही़ त्यातच बजरंग बोगद्यावरील शिरसोलीकडे जाणाऱ्या रेल्वे रुळावरील खांबा क्रमांक ४१८/१ जवळ धावत्या गितांजली एक्सप्रेस समोर त्याने स्वत:ला झाकून देत आत्महत्या केली़
जिल्हा रूग्णालयात नातेवाईकांची गर्दी
शवविच्छेदनासाठी मृतदेह जिल्हा रूग्णालयात नेण्यात आले़ त्यावेळी पोलिसांकडून पंचनामा करण्यात आला़ दरम्यान, घटनेची माहिती मिळताच नातेवाईकांनी जिल्हा रूग्णालयात एकच गर्दी केली होती़ सायंकाळी शवविच्छेदन झाल्यानंतर मृतदेह नातेवाईकांच्या ताब्यात देण्यात आला़ याप्रकरणी लोहमार्ग पोलिसात अकस्मात मृत्यूची नोंद करण्यात आली आहे़
वाहतुकीची कोंडी
अपघातस्थळी बघ्यांची मोठ्या प्रमाणावर गर्दी जमली होती. त्यामुळे पिंप्राळा रस्त्यावर दुतर्फा वाहनांच्या रांगा लागून वाहतुकीची कोंडी झाली होती. काही वेळाने वाहतूक सुरळीत करण्यात आली.
फोटोवर लिहीले होते नाव
गजानन याने आत्महत्या केल्यानंतर रेल्वे रूळाजवळ बघ्यांची प्रचंड गर्दी जमली़ त्यातील एका नागरिकाने घटनेची माहिती लोहमार्ग पोलिसांना दिली़ त्यानुसार अनिंद्र नगराळे व इतर पोलीस कर्मचाऱ्यांनी घटनास्थळी धाव घेवून आत्महत्या केलेल्या तरूणाची अंगझडती घेतली़ त्यात त्यांना फोटो व त्यावर गजानन महाजन लिहिलेले आढळून आले़ त्याच दरम्यान, एकाने तो फोटो ओळखला व गजानन याची ओळख पटली.